20
De ssali mai vai i lo te hadu
(Exo 17.1-7)
1 Gai de hagabuulingaa dangada o Israel ne hulo ga tae gi de vao go Zin, i tahi malama ga nnoho i Kadesh. Gai Miriam ne magau ga danu i kilaa.
2 Gai gu deai vai e unu ai dangada alodahi; gai gilaadeu ne hagabuni mai ga hai baasi ange gi Moses ma Aaron. 3 Gilaadeu ne hagadaumee ange gi Moses, ga hai ange, “Mee naa gimaadeu ne maakau, madali omaadeu daina ange laa, i mada luu mada o Tagi Maolunga 4 Gu aha gooluu gu gaamai ai nei de huaadangada o Tagi Maolunga gi de vao nei, gai gi maakau ai gimaadeu ma amaadeu manu i kinei? 5 Gai gu aha gooluu gu hagassao mai ai nei gimaadeu i Egypt, e gaamai gimaadeu gi de mommee baubau nei? De henua nei e deai donu grain iai, be ni fig, aabe ni grape aabe ni pomegranate. Gai e deai hogi vai unu iai!”
6 Gai Moses ma Aaron ga hulo gee mai daho dangada gu hagabuni laa, i de haitoga o de hale malo hagabuni, gai gilaau ga ino gi honga de gelegele. Gai de mahamaha o Tagi Maolunga gu hagasula mai gi gilaadeu. 7 Gai Tagi Maolunga ga hai ange gi Moses, 8 “Gaavee togo, mage hagabuni ina dangada, gai gooluu ma doo daina go Aaron ga pasa ange gi de hadu i madamada o dangada, gai denga vae e ssali mai naa i de hadu laa. Gai gooluu ga hai ai gi ssali mai vai i lo te hadu laa, e unu ai de hagabuulingaa dangada naa ma alaadeu manu haangai.”
9 Gai Moses ga kave togo e dugu laa i mada luu mada o Tagi Maolunga, bei dana hai gu tala ange ai gi de ia. 10 Gai Moses ma Aaron ne hagabuni de hagabuulingaa dangada laa, ga hai gilaadeu gi tuu i gaogao de hadu, gai ia ga hai ange gi gilaadeu, “Goodou nnoho mai hagalaangona muna nei, goodou ni dangada donu makaga oodou lodo; goodou diiloo gai gimaau ga hai oodou vai gi ssali mai i lo te baba nei.” 11 Gai Moses ne hagaabo togo ga hagaili ai de hadu laa i e lua hanonga. Gai gu ssali mai vai lagolago, gai de hagabuulingaa dangada laa ma alaadeu manu ga unu ai.
12 Gai Tagi Maolunga ga hai ange gi Moses ma Aaron, “Go hiidinga gooluu tee hagadonu agu muna, ma tee hagadubu au i madamada o de gau Israel, deelaa ai, e dee go gooluu e dagina de hagabuulingaa dangada e kave gi de henua aagu e gaavange gi gilaadeu.”
13 Mee nei ne hai i Meribah,*Meribah i muna Hebrew e bei go de hagadaumee. go kilaa o de gau Israel ne hagadaumee ange ai gi Tagi Maolunga, gai ia ga hagaago ange gi gilaadeu bolo ia e dabu.
Edom tee dugu ange Israel gi seesee i honga de henua
14 Gai Moses ne hai gi hulo hanu dangada hagailoo, mai i Kadesh gi hai ange gi de hodooligi o Edom, “Aanei muna a doo daina go Israel: koe e iloo dagodo o denga hai ngadaa alodahi gu hai mai gi gimaadeu. 15 Omaadeu dubuna madagidagi ne hulo gi Egypt, gai gimaadeu ne nnoho i Egypt i dahi masavaa daulooloa. De gau Egypt ne hagaduasala gimaadeu ma omaadeu dubuna, 16 aagai de masavaa huu omaadeu ne tangi ange ai gi Tagi Maolunga, gai ia ga hagallongo demaadeu dangidangi, ga gaamai dahi dangada de langi gi hagassao ina mai gimaadeu i Egypt.
Gai gimaadeu gu tae mai gi Kadesh, go de aduhale i de hiihii o de mommee e ngado mai ai doo henua. 17 Aude haihaia dugua mai gimaadeu gi seesee laa honga doo henua e hulo ai. Gimaadeu e dee seesee naa donu laa lodo oodou veelenga, aabe go lodo oodou veelengaa grape, gai gimaadeu e dee unu hogi vai i lodo oodou vai geli. Gai gimaadeu e seesee donu huu i de haiava laumalie o de hodooligi, gimaadeu e dee taa naa donu gi luu baasi de haiava, ga dae ai gi demaadeu hulo ga ui i doo henua.”
18 Aagai Edom ga hai ange, “Goodou e dee maua donu i de seesee mai donu laa honga dogu henua, gimaadeu kana loadu e hebagi adu gi goodou!”
19 Gai de gau Israel ga hai ange gi de ia, “Gimaadeu e seesee donu huu i de haiava laumalie; gai noo gimaadeu aabe go amaadeu manu e unu hanu au vai, gai gimaadeu ga hagao; gai gimaadeu e llodo donu huu e seesee laa honga doo henua e hulo ai, e deai ange donu amaadeu mee e hai.”
20 Aagai ia ga hai ange, “Goodou e dee maua donu i de seesee laa honga dogu henua.”
Gai Edom ne humai madali dahi hagabuulinga hebagi soa ma de mmahi, e hebagi ange gi gilaadeu. 21 Gai Edom tee dugu ange gilaadeu gi seesee laa honga dono henua; deelaa ai, de gau Israel ne huuhuli ga hulo i dahi haiava gee.
De magau o Aaron
22 Gai de hagabuulinga o de gau Israel ne loomai i Kadesh, gai gilaadeu ne hulo ga tae gi de mounga go Hor. 23 Gai Tagi Maolunga ga hai ange gi Moses ma Aaron i de mounga go Hor, i gaogao de mommee e ngado mai ai de henua o Edom, 24 “Aaron e magau naa ga hagabuni ai madali ono dangada; ia e dee maua gi dae gi de henua aagu e gaavange gi de gau Israel, i hiidinga gooluu ne hai baasi mai gi agu muna, i de vai go Meribah. 25 Gaamai Aaron ma dana dama go Eleazar ma goodou loage gi de mounga go Hor. 26 Gai koe ga hagaui malo haimeedabu o Aaron, ga hakahu ange ai dana dama daane go Eleazar; gai Aaron e magau naa i kilaa ga hagabuni madali ono dangada.”
27 Gai Moses ne hagassula muna a Tagi Maolunga gu tala ange; gai gilaadeu ne loage gi de mounga go Hor, i madamada o dangada alodahi. 28 Gai Moses ga hagaui malo haimeedabu o Aaron, ga hakahu ange ai dana dama daane go Eleazar; gai Aaron ne magau i honga de mounga i kilaa. Gai Moses ma Eleazar ga aahe iho gi lalo.*Exo 29.29; Num 33.38; Deut 10.6 29 Gai ga iloo huu e dangada alodahi bolo Aaron gu magau, gai de hagabuulingaa dangada o Israel ga tangi ma de hinangalosaa i Aaron i e matolu laangi.