1 Agu dama, goodou hagalaangona agoago a doodou damana,

gai kana ange hagalaangona, gi tonu ange goodou aagena;

2 go hiidinga au e gaavadu gi goodou agoago heohi,

goodou aude dilia agu agoago.

3 De masavaa oogu e gauligi ai i de hale o dogu damana,

gai dogu angaanga goi mmodo huu,

gai go tama hagamogomogo a dogu dinana,

4 gai dogu damana ne agoago mai au, ga hai mai, “Daohia agu muna i oo lodo,

doange ina agu muna e tala adu, gi mouli ai goe.

5 Haia gi heiangi goe, haia gi dahi oo donu ange;

aude ngalo agu muna, aabe gi hano gee i agu muna.

6 Aude dilia de heiangi, gai de heiangi ga buibui ai goe;

koe gi lodo mmao i de mee nei, gai ia ga hagaloosi adu ai goe.

7 Deenei taamada o de heiangi, deenei ai, haia gi heiangi goe,

gai be ni aha ange naa aau e kave, gai haia gi dahi oo donu ange.

8 Hagamogomogo ina de heiangi, gai ia ga hagaamua ai goe;

daohia de heiangi, gai koe ga kave de hagadubu.

9 De heiangi e hagamahamaha naa goe, bei de hau i honga doo biho,

gai e gaavadu gi de goe de hau mahamaha.”

10 Dagu dama, hagalaangona ma de daudali i agu muna,

gi lagolago ai oo ngadau e mouli ai.

11 Au gu agoago adu goe i de heiangi,

gai ne dagi goe i denga haiava heohi.

12 Gai ga seesee naa huu goe, gai luoo vae e dee llave,

gai ga savini naa goe, gai koe e dee baguu.

13 Daohia agu agoago, aude dilia donu,

gai diiloo ange gi danuaa, go hiidinga deenei doo mouli.

14 Aude duu i honga de haiava o de gau baubau,

gai gi dee seesee i de haiava baubau.

15 Hagaui gee i de haiava nei; aude seesee ai donu,

gai huli gee mai ai, ga hagasoe i doo haiava.

16 Go hiidinga gilaadeu e dee sseni naa donu ga dae ai gi delaadeu hai de baubau;

gilaadeu e dee maua gi sseni ga dae ai gi delaadeu hai dahi dangada ga haisala.

17 Go hiidinga de baubau e bei alaadeu mee e gai,

gai de vaivai hai dangada go alaadeu mee e unu.

18 Aagai de haiava o tangada heohi e bei de maalama o taiao,

e hagadagadaga ange laa de maalama ga dae ai gi de duu donu o de laa.

19 Hegau a de gau baubau e bei de gohu boo dangodango,

gilaadeu e dee iloo donu be se aha ne hagalaavea olaadeu vae ga baakuu ai laa gilaadeu.

20 Dagu dama, hagalaangona agu muna e tala adu;

huli mai luoo dalinga mage hagalaangona agu muna.

21 Aude dilia dahi agu muna daudahi,

gai daohia mee nei i oo lodo;

22 gai mee nei go de mouli ange gi gilaadeu e saalaa ga gidee,

gai e hagaieiangi olaadeu angaanga alodahi.

23 Gai de mee e hagamogomogo ange i mee alodahi,

go de dagitilo dagodo oo lodo,

go hiidinga go kilaa iai mee o de mouli.

24 Dilia gee de ngudu hadu muna,

gai daohia doo ngudu gi dee daalaa muna hakino gee.

25 Daumada ina donu huu oo mada i mua,

daumada ina oo mada i mua ma de hagasoe i doo haiava.

26 Hagassoea denga haiava oou e seesee ai,

gi dee haisala ai doo hai e seesee ai.*Heb 12.13

27 Aude daa gi de baasi madau be go de baasi masui,

gai huli gee i de baubau.