3
Hanu haigamaiana o de heiangi
1 Dagu dama, aude ngalo agu agoago,
aagai daohia agu hainga i oo lodo;
2 gi lagolago ai oo laangi ma ngadau e mouli ai
gai e hai naa ga laumalie doo noho baba.
3 De abodonu ma de hai hegau i de mee abodonu e dee hulo gee naa donu i oo daha,
gai daulia luu mee nei i doo ua, ma de sisi i oo lodo.
4 Gai de Maadua ma dangada e hagadubu naa goe ga hagaamua doo ingoo.*Luke 2.52
5 Hagadonusia Tagi Maolunga i oo lodo alodahi,
aude lango ange gi mee oou e donu ange aagena;
6 koe gi manadua ia i mee alodahi aau e hai,
gai ia ga dagi ai goe i denga haiava heohi.*ia ga dagi ai goe i denga haiava heohi, aabe ia ga hai ai gi ssoe oo haiava.
7 Aude hagadaba bolo koe e heiangi,
gai koe gi madagu i Tagi Maolunga, ma de kino i de baubau.*Rom 12.16
8 De mee nei e hai naa ga ieiangi goe,
ma de hagammahi lo too angaanga.
9 Hagadubu ina Tagi Maolunga i doo lava,
ma denga huamanu e hagihagi i taamada i lodo au veelenga alodahi;
10 gai gi hoohonu ai lodo o oo mommee doange,
gai au mommee hhao uvaini e hoohonu naa ga malingilingi.
11 Dagu dama, aude hagangadi mee ina de haele a Tagi Maolunga goe,
aabe gi kino i de hagallongo dana hagasee goe;*Job 5.17 *Heb 12.5-6; Rev 3.19
12 go hiidinga Tagi Maolunga e hagasee tangada oona e aloha ai laa,
bei dagodo hegau a tamana ange gi tama oona e malangilangi ai laa.
13 E manuuia tangada gu heiangi,
ma tangada gu dahi ono donu ange,
14 go hiidinga de mee e maua ai e danuaa ange i selevaa,
gai e haigamaiana ange i denga goolo.
15 De heiangi e hagamogomogo ange i denga ruby,
gai e deai ange donu se mee oou e lodo ai, e maua i de hagahedae ange aagena.
16 De mouli daulooloa e daohi i dono lima madau,
gai de lava ma de hagadubu i dono lima masui.
17 Ono haiava e hagamalangilangi,
gai ono haiava alodahi iai de nnoho paba.
18 De heiangi e bei de manu somo o de mouli, ange gi dangada alodahi e gaavee;
gai gilaadeu e daohia de heiangi nei, e manuuia donu.
19 Tagi Maolunga ne hagaduu henua i lalo i dono heiangi,
gai ne hagatuu mee i lo te langi i dono donu ange.
20 Dono iloo mee ne vvae denga moana kelo,
gai ne hai gi hano iho de mee suungia i lodo hagausinga.
21 Dagu dama, aude dilia de heiangi ma de maanetonu;
aude ngalo luu mee nei;
22 luu mee nei e gaavadu naa gi de goe de mouli,
gai e bei de mee dau e hagamahamaha ai laa doo ua.
23 Gai koe ga seesee ai naa i de baba,
gai koe e dee baguu ai naa donu;
24 de masavaa oou e dagodo ai gi lalo, gai koe e dee madagu;
de masavaa oou e dagodo iho ai e seni, gai koe e seni danuaa naa.
25 Aude madagu i de mee hagamaatagu e humai daa hagalele laa,
be go de hagaduasala e daia laa de gau baubau,
26 go hiidinga Tagi Maolunga go dau tali hagalodolodo,
ia e tilo naa gi dee doo ange doo vae gi lo te ssele.
27 Aude daohia de mee danuaa i gilaadeu e heohi dau bale ange,
noo e dahi oo ssauaa e hai ai de hegau nei.
28 Aude hai ange gi tangada e baa adu gi de goe,
“Hannoo ga aahe mai ange ai, gai au ga gaavadu ai gi de goe daiao” —
gai e dahi donu mee i oo daha.
29 Aude haia dahi hagatau baubau e hai baasi ange ai gi tangada e baa adu gi de goe;
go de ia e dahi ana tali i de goe i dono noho i oo gaogao.
30 Aude hagadaumee ange gi dahi dangada i teai hiidinga,
gai tigi ai se baubau aana ne hai adu gi de goe.
31 Aude lodo gaiaa ange gi tangada alasala,
aabe gi ago ange i ana hegau,
32 go hiidinga Tagi Maolunga e kino i tangada vaivai dagodo,
aagai ia tala ange ono lodo gi tangada heohi.
33 Tagi Maolunga e hagamalaia de hale o tangada baubau,
aagai e hagamanuuia de mommee noho o tangada heohi.
34 Ia e doo mee i gilaadeu e doo mee i de ia,
aagai e abodonu ange gi gilaadeu e lodo maolalo.*Jms 4.6; 1 Pe 5.5
35 Tangada heiangi e hagadubulia naa,
aagai de gau llodo ssenga e dookaa naa.