1 Dagu dama, noo koe e hagallongo agu muna

ma de hagamogomogo agu muna adu gi de goe,

2 ma de kana ange ga hagallongo gi donu ange goe aagena

ga hai gi donu danuaa ange goe aagena;

3 gai noo koe e dangi ange gi dahi ai au iloo

ma de ssili gi donu ange ai goe;

4 noo koe e ssala de heiangi bei dau ssala gi maua denga selevaa

ma goloa hagamogomogo e gide ngadaa laa,

5 gai koe e donu ange naa gi dagodo de madagu i Tagi Maolunga,

ma de maua de iloo mee o de Maadua.

6 I hiidinga go Tagi Maolunga e gaavadu de heiangi abodonu,

gai go ia e daalaa adu dagodo o de iloo mee, ma de donu ange.

7 Ia e doange de heiangi e gaavange gi gilaadeu e heohi,

ia se buibui niiolaadeu e dee haisala,

8 ma de hagaloosi ange haiava olaadeu e hai hegau i de mee heohi,

ma de buibui haiava o ono dangada dabu.

9 Gai koe e donu ange naa gi de mee heohi ma de hagamodu heohi, ma de soe,

aama haiava danuaa alodahi.

10 Go hiidinga de heiangi e gaavadu naa gi oo lodo,

gai de iloo mee e hagamalangilangi naa goe.

11 Doo maanetonu e buibui naa goe,

gai doo donu ange e hagaloosi adu naa goe,

12 ga hagaola goe mai i de haiava o de baubau

ma mai i gilaadeu e hagahai ngadaa ina dangada i alaadeu muna,

13 gilaadeu e tili denga haiava ssoe

gai ga seesee i haiava o de gohu;

14 gilaadeu e malangilangi i de hai mee dee heohi

ma de llodo danuaa i de hagammahi e hai de baubau;

15 gai olaadeu haiava e pigo,

gai gilaadeu e hai hegau i de hagasenga.

16 De heiangi e buibui goe i de hine dagodo haisala,

ma de hine baubau e hagasengalia laa goe i ana muna;

17 go de hine gu tili dono bodu ne hai i de masavaa oona se damaa hine ai,

ma de ngalo de hagatoo donu aana gu hai i mada luu mada o de Maadua.

18 De haiava ange gi dono hale e hano ga duu ange gi de magau,

gai ono haiava e hulo ga tuu ange gi de gau maakau;

19 e deai donu se daane e hano gi ono daha e ahe mai

aabe e maua de haiava o de mouli.

20 Gai koe gi daudali i de haiava o de gau danuaa,

ma de seesee i haiava o olaadeu e heohi.

21 I hiidinga go gilaadeu e heohi e nnoho i honga de henua,

gai go gilaadeu e dee haisala e doe ga nnoho i kilaa;

22 aagai de gau baubau e hai naa gi dee nnoho i de henua,

gai dangada e dee hai hegau i de mee abodonu e hai naa gi hulo gee mai i kilaa.