1 Dagu dama, noo koe gu hagatoo donu e hagao muli

a tangada e baa adu gi de goe,

noo koe gu hagatoo donu i dau luuluu de lima o dahi dangada;

2 noo koe gu noodia i au muna gu tala,

ma de boogia i hiidinga o au muna gu tala,

3 dagu dama, deenei dau mee e hai gi ola ai goe,

go hiidinga koe gu doo ange gi lo te lima o dahi dangada:

hannoo hagamaolalo ina goe, ma de dangidangi ange gi de ia!

4 Aude seni donu,

aabe gi damaa mmoe luoo mada.

5 Hagaola ina goe, bei dagodo o dahi dia e ola mai laa i tangada dili manu,

ma de manu lele e ola mai laa i ssele a tangada dili manu.

6 Tangada vaiduu, hannoo gi daho de loa,

diiloo ai alaadeu hegau, gi heiangi ai goe!

7 Denga loa e deai donu se dangada e daalaa ange alaadeu mee e hai,

e deai se dangada e diiloo ange gilaadeu, aabe se dagi,

8 gai gilaadeu e hagadabena delaadeu hagamouli i de masavaa mahanahana,

ma de hagabudu alaadeu gai i de masavaa o de hagihagi.

9 Tangada vaiduu, dee hee maa taulooloa doo dagodo donu huu i kinaa?

Go aahee maa oou e alahage ai?

10 Koe e hagadaba, “Au e damaa mmoe luoogu mada, e damaa seni ange,

au e damaa hagapogo luoogu lima e hagamabu iho” — *Pro 24.33-34

11 de hagaau aloha e duu adu naa gi de goe bei tangada gaiaa,

gai tuasala e bei taane gu hagauda ono goloa hebagi.

12 Tangada e deai ono haigamaiana, se dangada baubau,

e hagadaga saele ma e tala denga muna hhadu;

13 ia e hai gi dabadaba luoono mada,

ma de sisi ange i luoono vae,

aama de sisi ange i ono madannia;

14 ia e hagasaele denga hagatau baubau i ono lodo,

ma de hagadee heloongoi magavaa o dangada i masavaa alodahi.

15 Deenei ai, de hai ngadaa e daa hagalele naa donu de duu ange gi de ia;

gai e moolau naa donu dono hai ngadaa, gai ia e dee ieiangi naa donu.

16 E ono mee o Tagi Maolunga e kino ai,

gai e hidu mee hakino gee i ono daha:

17 go luu mada hagamaolunga,

ma de alelo hadu muna,

ma lima e daia dangada tigi haisala,

18 ma de lodo e haia denga hagatau baubau,

ma luu vae e moolau laa de hano e hai de baubau,

19 ma tangada tala hagadonu hadu muna,

aama tangada e haia ga dee heloongoi denga hai daina.

20 Dagu dama, daohia hainga a doo damana,

gai koe gi dee dilia agoago a doo dinana.

21 Daohia mee nei i oo lodo i masavaa alodahi,

gai daulia ange mee nei gi doo ua.

22 Agoago nei e dagi naa goe i doo seesee,

ma de dagitilo goe i doo masavaa e seni ai,

gai e madaangudu adu naa gi de goe i doo alahage.

23 Go hiidinga de muna nei e bei de laama, gai de agoago nei se mee hagamaalama;

gai doo hagaheohi ina e hagaabo ange goe gi de haiava o de mouli,

24 gai e buibui ai goe i de hine dagodo haisala,

ma de ngudu maimai o de hine dau bodu hai be se manu.

25 Aude lodo ange gi dono mahamaha,

aabe gi dugua ange ia gi hagasengalia goe

i dana hagadabadaba adu luoono mada,

26 gai de hagaoanga o de hine hai be se manu

se duudangaa pelaoaa donu huu,

gai de hine dau bodu e dagitilo e vaivai hai doo mouli.

27 E maua e tangada i de hhao ange de ahi gi ono hadahada,

gai ono malo e dee vvela?

28 Aabe e maua e tangada i de seesee i honga denga maga ahi ula,

gai luoono vae e dee vvela?

29 Gai e bei ai hogi taane e hano gi daho de bodu o dahi daane gee,

taane e dagodo haisala ma de hine laa e hagaduasala donu.

30 Dangada e dee hagabaubau tangada gaiaa

noo ia e gaiaa i dono hiigai,

31 aagai noo ia gu boogia mai, gai ia e hagao donu gi hidu hanonga e kii ange ai,

e dee galemu donu noo ia e gaavange ono goloa alodahi e hagao ai.

32 Taane dagodo haisala se dangada donu senga,

gai be goai e haia hegau nei e daa donu huu ia ga magau.

33 Taane bee nei e hagailiilia naa ma de hagangadi mee ina,

gai dono hagadogaa e dee haihai naa donu ga hagadeai;

34 gai de maagoda e hai ga kona de lili o taane dau bodu,

gai ia e dee degi ange naa donu, i de laangi aana e sui ange ai de baubau.

35 Ia e dee lodo donu e kave dahi hagaoanga;

ia e dee kave naa donu au ngadi gaavange lagolago.