1 Dagu dama, koe gi daohia agu muna

ma de doange agu hainga i oo lodo.

2 Daohia agu muna gi mouli ai goe,

gai hagamogomogo ina agu agoago,

bei tama legalega eidu i lo too ganomada.

3 Noodia ange mee nei gi honga oo madannia,

gai siia ange gi oo lodo.

4 Hai ange gi de heiangi, “Go koe dogu daina hahine,”

gai haia de donu ange gi bei doo dangada donu.

5 Luu mee nei e buibui naa goe i de hine dagodo haisala,

go de hine maimai dono ngudu.

6 Au nogo duu i ma te abaaba damaa mee i dogu hale,

ga galo iho ai laa magavaa o denga laagau.

7 Gai au ne galo ange ga tilo denga dama daane mmodo,

gai au ne gidee dahi dama daane i olaadeu magavaa,

ia se dama daane lodo senga.

8 Ia e seesee iho i honga de haiava i gaogao de hale o dahi hahine,

gai ia ne seesee i de haiava e hano laa gi de hale o de hine laa,

9 i de masavaa gu dai gohugohu ai i de ahiahi,

gai gu baa ange gi de boo de mee.

10 Gai tilo, dahi hahine ne humai ga hedae ange gi de ia,

ia gu gahu bei de hine hai be se manu, gai e heiangi vaivai dagodo.

11 Ia se hine nngana de leo ma de makaga ono lodo,

ia e dee maua i de noho donu huu i dono hale;

12 ia e hano saele i honga de haiava ma lodo mommee hagao mee,

ma de duu i dege o denga haiava.

13 Ia ne poo tama daane laa ga oso ia,

gai tee dogaa donu i de hai ange:

14 “Au ne hai ssigidaumaha hagadanuaa magavaa anailaa nei,

gai au gu lava i de hagassula agu mee gu hagatoo donu ai.

15 Deenei ai, au gu humai e hedae adu gi de goe,

ma de hagammahi ga ssala goe, gai au gu gidee goe.

16 Au gu haoli dogu moenga i malo linen iai leebunga danuaa mai i Egypt.

17 Au gu hagamanongi dogu moenga i denga myrrh, ma aloe, aama cinnamon.

18 Humai, gidaau ga hai gi tae odaau lodo i de aloha

ma de hagamalangilangi gidaau ga dae ai gi de ao ai de mee.

19 Go hiidinga dogu bodu gu dee maleva i de hale,

ia gu hano gi dahi mommee mmao.

20 Ia ne kave madali ia dahi beagi hhao sseene,

gai ia e dee ahe mai naa donu ga dae ai gi de honu de maasina.”

21 Gai ana muna hagasenga gu kave lodo o tama daane laa,

gai de hine laa ne kave ono lodo i dono ngudu maimai.

22 De masavaa laa donu huu gai tama daane laa ga daudali ange i de hine laa,

bei dagodo o de kaau e hano laa gi de mommee e daa ai denga manu,

ia e bei dahi dia gu noodia laa i ssele,

23 ga dae ai gi de velosia dono ade;

ia e bei de manu lele e hagasoe ange laa gi lo te sele,

ia tee iloo donu bolo e daa naa ia ga magau.

24 Agu dama, nnoho mai hagalaangona agu muna,

gai kana ange daohia agu muna e tala adu.

25 Koe gi dee lodo e daudali i ono haiava,

gai koe gi dee daudali ange i ana dahulinga baubau.

26 Gu soa daane aana ne hagaduasala,

ana daane ne daa ga maakau e dee maua i de dau.

27 Dono hale go de haiava e hano laa gi de mommee o de gau maakau,

gai e hano iho gi lodo daanunga o de gau maakau.