1 De heiangi gu hagaduu dono hale;

gai ia gu duuduu mai i lo te baba e hidu duludulu moo de hale laa.

2 Ia gu daa denga manu e hai ai giidagi, ma de hilo ana uvaini,

ia gu hagadabena dana deebele.

3 Ia gu kave ono haahine hai hegau gi tuu

i honga mommee maolunga hugadoo o de aduhale,

gi hagaagahia ai dangada.

4 “Be goai e lodo senga, gai ia gi daa mai gi kinei!”

Ia ne hai ange gi dangada e dee tonu,

5 “Loomai gaina agu gai,

ma de unu agu uvaini gu hilo.

6 Dilia oodou llodo ssenga gi mouli ai goodou,

gai daudali i de haiava e maua ai goodou gi tonu ange.”

7 Be goai e hagaheohi ina tangada doo mee e hagadogaa ina naa,

gai be goai e hagaseegina tangada baubau e hagammae ina naa.

8 Koe gi dee hagaseegina tangada doo mee, go hiidinga ia e kino naa i de goe,

aagai hagaseegina tangada heiangi, gai ia e aloha naa i de goe.

9 Agoagona ange tangada heiangi gi kii ange ai dono heiangi;

agoagona ange tangada heohi, gi kii ange ai dana mee e iloo.

10 De madagu i Tagi Maolunga go taamada o de heiangi,

gai dau iloo de Ia Dabu laa go de hai ga donu ange goe.*Job 28.28; Psa 111.10; Pro 1.7

11 Go de heiangi e haia ga daulooloa doo mouli,

ma de hai ga lagolago oo ngadau e mouli ai.

12 Noo koe e heiangi, gai e danuaa adu donu gi de goe,

gai noo koe se dangada doo mee, gai go koe donu huu e duasala ai.

13 De lodo senga e bei de hine nngana de leo,

ia se hine e hagasengalia ngaohie ma teai sono iloo mee.

14 Ia e noho i ma te abaaba o dono hale,

ma honga mommee maolunga hugadoo o de aduhale,

15 ma e hagahi ai dangada e seesee mai laa kilaa,

go dangada e seesee laa donu huu ma e hulo i honga de haiava.

16 “Be goai naa huu ni dangada llodo senga, gai gilaadeu gi taa mai gi kinei!”

Ia e hai ange gi tangada lodo senga,

17 “Denga vai gaiaa e maimai,

gai denga gai e gai hagammuni laa e mammami!”

18 Aagai gilaadeu e dee iloo donu bolo go kilaa iai de gau maakau,

gai dangada i kilaa gu nnoho donu i lo te geelonga o de gau maakau.