1 Muna hagasengasenga a Solomon.

Tama daane heiangi e hagamalangilangi dono damana,

aagai tama lodo senga, e hagadaemaha dono dinana.

2 Goloa hagamogomogo e maua laa i de mee dee heohi

e deai donu ono haigamaiana,

aagai de mee heohi e hagaola mai i de magau.

3 Tagi Maolunga e dee dugu ange tangada heohi gi hiigai,

aagai ia e hai gi dee maua e tangada baubau ono mee e lodo ai.

4 Tangada vaiduu e hagaau aloha donu,

aagai tangada hai mee e sula naa ga se dangada lava.

5 Tangada e hagabudulia huamanu

i de masavaa mahanahana se dama heiangi,

aagai tangada e seni i de masavaa o de hagihagi,

se dama hagadookaa dangada.

6 Denga manuuia e loomai gi tangada heohi,

aagai de ngudu o tangada baubau e hagammuni dono alasala.

7 De hagamaanadu o tangada heohi se manuuia,

aagai ingoo o de gau baubau e pobo naa ga llilo.

8 Tangada heiangi e daohi denga hainga,

aagai tangada lodo senga vava de ngudu e dee hagadagadaga age donu.

9 Tangada e hai hegau laa i de mee abodonu e noho baba,

aagai tangada e seesee laa i denga haiava dee heohi e gidee mai naa ono dagodo.

10 Tangada e hagadabadaba laa luoono ganomada e hagadaemaha de lodo,

gai tangada lodo senga e vava laa de ngudu e dee sula donu.

11 De ngudu o tangada heohi e bei de vai hagamouli,

aagai muna a tangada baubau e hagammuni dono alasala.

12 De kino i dangada e hagahale tee buni o dangada,

aagai de aloha e haoli denga haisala alodahi.*Jms 5.20; 1 Pe 4.8

13 De heiangi e sula mai i lodo muna a tangada e donu ange,

aagai de laagau se mee e hagaili ai tua o tangada dee donu.

14 De gau heiangi e ago gi kii ange delaadeu iloo mee,

aagai muna a tangada lodo senga e hagahai ngadaa donu huu ia.

15 Goloa lagolago o tangada lava e bei de aduhale gu buibui laa ma gu makaga,

aagai de hagaau aloha o tangada e hai ga dee hagadagadaga age ia.

16 De hagaoanga o tangada heohi go de mouli,

aagai de hagaoanga o tangada baubau go de hagaduasala.

17 Tangada e hagalaangona laa muna hagaheohi e hagaago mai de haiava o de mouli,

aagai tangada e dee anga ange gi muna hagaheohi e dagi ange dangada ange laa gi de haisala.

18 Tangada e hagamuunia laa dono kino se dangada donu hadu muna,

gai be goai e hagadele ina muna hagabaubau se dangada lodo senga.

19 De masavaa naa huu aau e tala ai muna lagolago, gai koe e maua donu gi haisala,

aagai tangada e maua i de daohi dono alelo se dangada heiangi.

20 Muna a tangada heohi e bei denga selevaa danuaa,

aagai lodo o tangada baubau e deai donu haigamaiana.

21 Muna a tangada heohi e bale ange dangada soa,

aagai de gau llodo ssenga e maakau i hiidinga delaadeu ssenga.

22 De hagamanuuia a Tagi Maolunga e gaamai de lava,

gai e deai donu se mee hagadaemaha iai.

23 Tangada lodo senga e hakadanga i dahulinga baubau,

aagai de heiangi se mee hagamalangilangi ange gi tangada e dahi ono donu ange.

24 De mee o tangada baubau e madagu ai laa, e duu ange naa donu gi de ia,

aagai de mee o tangada heohi e lodo ai e gaavange naa donu gi de ia.

25 De gau baubau e gaavee gee naa i de masavaa e dau ai de madangi mmahi,

aagai tangada heohi e duu ma e makaga ga hano ai.

26 Denga vinegar e hai ga ssae denga niho,

gai de useahi e hai ga tangi luu mada,

gai e bei ai hogi dagodo o tangada vaiduu

a dono dangada aamua e hai laa gi suuia ia.

27 De madagu i Tagi Maolunga e hai ga daulooloa de mouli o tangada,

aagai ngadau o de gau baubau e tuu mai naa gi sogoisi.

28 De tali hagalodolodo a dangada e haia de mee heohi e hidi mai ai de malangilangi,

aagai de tali a de gau baubau e lilo naa donu.

29 Tagi Maolunga go mommee buibui makaga o tangada e haia de mee heohi,

aagai e daa gi maakau gilaadeu e haia de baubau.

30 Tangada heohi e dee hagangalue naa donu;

aagai tangada baubau e dee noho naa i honga de henua.

31 Muna a tangada heohi e tala iai de heiangi,

aagai tangada hadu muna e hai naa gi dee basa.

32 Tangada heohi e iloo be aahee muna e heohi ange gi dahi masavaa,

aagai tangada baubau e tala donu denga muna hhadu.