1 Tama daane heiangi e hagallongo agoago a dono damana,

aagai tama hagamanege e hagangadi mee dono hagaseegina.

2 Muna a tangada e hai ia ga gai mee danuaa,

aagai mee o de gau haisala e llodo ai go de alasala.

3 Tangada e kana ange laa gi ana muna e tala,

e hagaloosi dono mouli,

aagai tangada e lagolago laa ana muna e tala,

e duu ange donu gi de hagaduasala.

4 Tangada vaiduu e lodo gi mee,

gai e deai donu ana mee e mau,

aagai tangada hai hegau e maua mee alodahi oona e lodo ai.

5 Tangada heohi e kino i de tala muna hadu,

aagai hegau a tangada baubau e hagadookaa ma de hagangadi mee ina.

6 De mee heohi e hagaloosi tangada e dee haisala,

aagai de baubau e hai gi dee sula tangada baubau.

7 Dahi dangada e hai bolo ia se dangada lava,

aagai e deai donu ana mee;

gai dahi e hai bolo ia e hagaau aloha,

aagai e lagolago donu ono goloa.

8 De lava o dahi dangada e maua i de hagaola dono mouli,

aagai e deai donu dangada e hagamadagu ina tangada hagaau aloha.

9 De maalama o tangada heohi e maalama mmao,

aagai de laama a tangada baubau e diinei naa donu.

10 De hagamaolunga e hidi mai ai de hagadaumee,

aagai de heiangi e gidee i daho dangada e gaavee muna bale.

11 De lava e maua laa i de hadu muna e moolau donu de odi,

aagai de lava e hagabudu dagi de momo laa

e hagadagadaga age donu.

12 Noo de tali hagalodolodo a tangada tee sula, gai ono lodo e daemaha,

aagai de hai ga ssula lodo o tangada e bei de manu somo o de mouli.

13 Tangada e hagangadi mee ina laa muna bale e hagaduasala donu;

aagai tangada e hagadubu ina denga hainga e kave naa dono hagaoanga.

14 Agoago a tangada heiangi e bei de vai o de mouli,

e hagaui gee ina laa tangada mai i de magau.

15 De heiangi e hai ga hagadubu ina tangada,

aagai de haiava o tangada e dee hai hegau laa i de mee abodonu e hai ngadaa.

16 De gau maanetonu alodahi e hai hegau i de iloo mee,

aagai hegau a tangada lodo senga e hagaago mai dono lodo senga.

17 Tangada hagailoo baubau e duu ange naa gi de hai ngadaa,

aagai tangada hagailoo e hai hegau laa i de mee abodonu e hagaheloongoi dangada.

18 Tangada e dee anga ange laa gi muna bale e hagaau aloha ma de hagadogaa ina,

aagai tangada e hagalaangona laa muna hagaheohi e maua de hagadubu.

19 E hagamalangilangi de hai ga bei lodo o tangada,

aagai tangada lodo senga e dee lodo e hano gee mai i de baubau.

20 Tangada e daudali ange i de gau heiangi e hagadaga ange naa de heiangi,

aagai tangada e hagabuni ange gi de gau llodo ssenga e hagaduasala donu.

21 De hai ngadaa e daudali ange i de gau haisala,

aagai de hagaoanga o olaadeu e heohi go tanuaa.

22 Tangada danuaa e bolo ange dahi mee gi ono mogobuna,

aagai de lava o tangada baubau e doange moo tangada heohi.

23 De gelegele o tangada hagaau aloha tigi doo laa

e maua donu gi lagolago hua iai,

aagai e gaavee gee naa i de gau vaivai daakodo.

24 Tangada e daohia de laagau haaele, e kino i dana dama,

aagai tangada e aloha laa i dana dama,

e kana ange ga haele ia.

25 Tangada heohi e gaimee ga bosu danuaa,

aagai lo te dinae o tangada baubau e hiigai i masavaa alodahi.