1 De hine heiangi e hagaduu age dono hale,

aagai de hine lodo senga e oha iho dono hale.

2 Tangada e hai hegau laa i de mee abodonu e madagu i Tagi Maolunga,

aagai tangada e hai hegau laa i de hagasenga e hagangadi mee ia.

3 Muna a tangada lodo senga e bei de laagau e hagailiili ai laa tua,

aagai muna a de gau heiangi e buibui gilaadeu.

4 Noo e deai donu kaau, gai de mommee o denga manu gu ngadi dagodo;

aagai mahi o denga kaau e hai ga lagolago hua manu.

5 Tangada tala hagadonu i de mee abodonu e dee hadu muna i de masavaa e hagamodu ai muna,

aagai tangada tala hagadonu hadu muna e tala muna hhadu.

6 Tangada doo mee e ssala de heiangi, gai e dee gidee e ia,

aagai de iloo mee e hai ngaohie

ange gi tangada e donu ange laa.

7 Hagaui gee mai i tangada lodo senga,

go hiidinga koe e dee maua de iloo mee i ana muna e tala.

8 Tangada maanetonu e heiangi i de hagasaele dono haiava e hano ai,

aagai de gau llodo ssenga e hagasengalia donu.

9 De gau llodo ssenga e hakadanga i de hagaheohi o haisala,

aagai gilaadeu e heohi e kave naa de abodonu.

10 Tangada e donu iho gi dagodo de daemaha ono lodo,

gai e deai hogi se dangada e iloo dagodo o dono malangilangi.

11 De hale o tangada baubau e oha naa ga maoha,

aagai de hale malo o tangada heohi e hagadagadaga ange naa.

12 E dahi haiava e dulagi be go de haiava heohi ange gi tangada,

aagai e hano ga duu ange gi de magau.*Pro 16.25

13 Ga gadagada naa donu tangada, gai ono lodo e mmae donu,

gai de malangilangi e sui naa donu ga se lodo baubau.

14 Tangada e huli gee laa i de mee heohi e kave naa donu de hagaoanga o ana hegau,

gai tangada danuaa e kave naa hogi de hagaoanga o ana hegau.

15 Tangada senga e hagadonusia mee alodahi,

aagai tangada maanetonu e dagitilo dono hai e seesee ai.

16 Tangada heiangi e madagu i Tagi Maolunga, ma de kino i de baubau,

aagai tangada lodo senga e lodo maolunga ma de vaivai hai hegau.

17 Tangada e moolau laa de lili e hai hegau i de lodo senga,

gai dangada e kino i tangada e haia hagasaele baubau.

18 De gau llodo ssenga e kave de lodo senga,

aagai de gau maanetonu e kave naa de iloo mee.

19 De gau baubau e ino naa gi lalo i mada i mua o de gau danuaa,

gai de gau baubau e ino naa gi lalo i gaogao haitoga o tangada heohi.

20 Dangada e paa ange gi tangada hagaau aloha e kino donu hogi i de ia,

aagai tangada lava e soa dangada e hai soa ange gi de ia.

21 Tangada e hagangadi mee ina tangada e baa ange gi de ia e haisala donu,

aagai e manuuia tangada e abodonu ange gi gilaadeu e duasala.

22 Dangada e haia hagatau baubau e haisala donu,

aagai gilaadeu e haia hagatau danuaa, e kave de abodonu ma de mee abodonu.

23 Hegau alodahi e hanu donu mee e maua ai,

aagai denga ngadi muna e hai ga hagaau aloha tangada.

24 De lava o de gau heiangi go de hau i honga olaadeu biho,

aagai de llodo ssenga o de gau llodo ssenga e hagaago mai de lodo senga.

25 Tangada tala hagadonu i de muna abodonu e hagaola mouli o dangada,

aagai tangada tala hagadonu hadu muna e daahanga dangada.

26 Tangada e madagu laa i Tagi Maolunga e lodo mmahi,

gai se buibui ange gi ana dama.

27 De madagu i Tagi Maolunga go de vai o de mouli,

gai e hagaui gee tangada mai i de magau.

28 Dangada soa mmao go de mahamaha o de hodooligi,

aagai tagi o de henua e dee sula donu

noo e deai dangada e hagallongo ange gi de ia.

29 Tangada e dee moolau laa de lili se dangada e laumalie dono donu,

aagai tangada e moolau laa de lili e hagaago mai dono lodo senga.

30 De baba i lodo o tangada e hai ga mmahi de angaanga,

aagai de lodo gaiaa e hai ga pobo ivi o tangada.

31 Tangada e vaivai haia laa tangada hagaau aloha e hagangadi mee de ia ne haia gilaau,

aagai be goai e abodonu ange gi gilaadeu e duasala e hagadubu de Maadua.

32 Tangada baubau e hagaduasala donu huu i ana hegau baubau,

aagai tangada heohi e dahi donu ono buibui i de masavaa o de magau.

33 De heiangi e dagodo i daho tangada e donu ange laa,

gai e dee maleva donu i lodo o tangada senga.

34 De mee heohi e hai ga maolunga dahi henua,

aagai de haisala e hagadookaa dangada.

35 De hodooligi e malangilangi i tangada hai hegau heiangi,

aagai tangada hai hegau hagadookaa dangada e hagaduasala naa i dono bole.