1 De muna maamaane e tuu de bole,

aagai muna pada e hai ga lili tangada.

2 Muna a tangada heiangi iai de iloo mee,

aagai muna a tangada lodo senga e hagaago mai dono senga.

3 Luu mada o Tagi Maolunga i mommee alodahi,

ia e dagitilo de gau baubau aama gilaadeu e danuaa.

4 De muna maamaane e bei de manu somo o de mouli,

aagai tangada e daahangadia dangada e hagammae lodo o tangada.

5 Tangada lodo senga e hagangadi mee de haelenga a dono damana,

aagai tangada e anga ange laa gi dono hagaheohi ina se dangada maanetonu.

6 De hale o tangada heohi e honu i goloa hagamogomogo,

aagai de hagaoanga o tangada baubau e gaavange gi gilaadeu de hai ngadaa.

7 Muna a tangada heiangi e hagalagolago de iloo mee;

gai e dee aanei dagodo lodo o de gau llodo ssenga.

8 Ssigidaumaha a tangada baubau se mee hakino gee i daho Tagi Maolunga,

aagai ia e malangilangi i dalodalo a dangada e heohi laa.

9 Hegau a tangada baubau ni mee hakino gee ange gi Tagi Maolunga,

gai ia e aloha i tangada e hagaduu ngae ma e ssala de mee heohi.

10 Tangada e hano gee laa i de haiava heohi e kona dono haelenga,

gai tangada e kino laa i dono hagaheohi ina e magau naa donu.

11 De mommee o de gau maakau ma Abaddon e maahuge i mada luu mada o Tagi Maolunga,

gai lodo o dangada e kii ange donu de maahuge ange gi de ia.

12 Tangada doo mee e kino i muna hagaheohi;

gai ia e dee ssili ange dahi mee gi tangada heiangi.

13 De lodo e malangilangi laa e hai luu mada o tangada ga malangilangi,

aagai de lodo hinangalosaa e hagadaemaha de hagasaalunga o tangada.

14 Tangada e donu ange laa e lodo e hagalaumalie dono iloo mee,

aagai tangada lodo senga e noho donu huu i dono ssenga.

15 Laangi alodahi o tangada e vaivai haia e baubau,

aagai tangada e lodo malangilangi laa, e bei tangada e daonga laa i masavaa alodahi.

16 E danuaa ange de sogoisi oo goloa gai koe e madagu i Tagi Maolunga,

i de lagolago oo goloa gai koe e dee baba oo lodo.

17 E danuaa ange de haigai e hai denga manu ssomo,

gai dangada e hagadau aaloha,

i de haigai e hai i de kaau bedi gai dangada e hagadau kino.

18 Tangada e moolau laa de lili e hai ga hagadaumee dangada,

aagai tangada e golomagi ina ono lodo e hai ga tuu de hagadaumee o dangada.

19 De haiava o tangada vaiduu e buibuia i manu daladala,

aagai de haiava o tangada heohi, gu hai ma gu se haiava soe.

20 Tama daane heiangi e hai ga malangilangi dono damana,

aagai tangada lodo senga e hagangadi mee dono dinana.

21 De lodo senga e hagamalangilangi ange gi tangada senga,

aagai tangada e dahi ono donu ange e seesee i de mee heohi.

22 Denga hagatau e dee ssula noo e deai muna bale,

aagai de gau hagasaele soa e hai ga ssula denga hagatau.

23 Tangada e malangilangi laa i de basa ange i de muna heohi,

gai se mee danuaa mmao de tala

de muna e heohi ange gi de masavaa!

24 De haiava o tangada heiangi e duu ange gi de mouli,

gai e daohi ia gi dee hano iho gi mommee o de gau maakau.

25 Tagi Maolunga e oha de hale o tangada hagamaolunga,

aagai ia e hai gi dee hagangaalue ina goinga o de hine gu magau dono bodu.

26 Tagi Maolunga e kino i maanadu a tangada baubau,

aagai ia e malangilangi i muna alaadeu e gilimalali.

27 Tangada nnoo hagamau mee, e hagahai ngadaa dono huaabodu,

aagai tangada e kino i denga ngadi gaavange hagasenga e mouli donu.

28 Tangada heohi e maanadu i mua dono basa,

aagai tangada baubau e tala donu huu muna baubau.

29 Tagi Maolunga e mmao gee i de gau baubau,

aagai ia e hagallongo dalodalo alaadeu e heohi.

30 Tangada malangilangi e hagamalangilangi lodo o dangada,

gai longo danuaa e hagalodo mmahi lodo o dangada.

31 Tangada e hagalaangona muna o de mouli e hagaheohi ange ai laa ia,

e noho i magavaa o de gau heiangi.

32 Tangada e hagangadi mee ina laa dono hagaseegina e hagangadi mee donu huu ia,

aagai tangada e anga ange gi dono hagaheohi ina e kii ange naa de heiangi.

33 De madagu i Tagi Maolunga e agoago ange tangada i de heiangi,

gai de lodo maolalo e humai i mua de hagadubu.