1 Tangada e hai denga hagatau i ono lodo,

aagai go Tagi Maolunga e gaavange muna e basa ange ai.

2 Tangada e maanadu bolo ana hegau alodahi e gilimalali,

aagai Tagi Maolunga e hagahidi dagodo o ono lodo.

3 Hagatuulia ange au hegau gi Tagi Maolunga,

gai au hagatau e hagadagadaga age naa donu.

4 Tagi Maolunga e hagahai hegau mee alodahi gi bei dana hagatau;

ia e hagadabena ange donu hogi tangada baubau gi de laangi o de hagaduasala.

5 Tagi Maolunga e kino i dangada hagamaolunga alodahi.

Ni muna abodonu, de gau bee nei e dee haihai naa donu ga dee hagaduasala.

6 Go de aloha ma de hai hegau i de mee abodonu e maatala ai haisala,

gai de madagu i Tagi Maolunga e hai tangada gi hano gee i de baubau.

7 De masavaa naa huu a tangada e hai ai ga malangilangi Tagi Maolunga,

gai ia e hai donu hogi ono hagadaumee gi hagadanuaa ange gi de ia.

8 E danuaa ange doo hagaau aloha, gai koe e hai hegau i de mee heohi,

i dau mau goloa lagolago gai koe e dee hai hegau i de hagamodu heohi.

9 Tangada e hai denga hagatau i ono lodo,

aagai go Tagi Maolunga e hilihilia de hai e hai ai.

10 De hodooligi e basa i ssauaa o de Maadua,

gai dono ngudu e dee hagahaisala de hagamodu heohi.

11 De mee haide ma de mee hagabau heohi ni mee nii Tagi Maolunga;

gai mee alodahi e hagahidi go ia ne haia.

12 Denga hodooligi e kino i de hai a dangada denga hegau baubau,

go hiidinga de nohoanga hodooligi e hagaduu ga makaga i de heohi.

13 Denga hodooligi e malangilangi i tangada e daalaa de muna abodonu,

gilaadeu e aaloha i tangada e daalaa de mee abodonu.

14 De bole o de hodooligi e bei tangada e gaamai longo o de magau,

aagai tangada heiangi e maua i de hagasili dono bole.

15 Ga malangilangi naa huu de hodooligi, gai gu mouli dangada,

gai dono abodonu e bei de hagausinga e pala iho ai laa de langi.

16 E danuaa ange dau hai gi heiangi goe i de hai gi lagolago au goolo,

ma dau hilihili gi donu ange goe i dau hai gi lagolago au selevaa.

17 De haiava o dangada e haia de mee heohi e hagaui gee i de baubau,

gai tangada e dagidiiloo dono haiava e hagaola dono mouli.

18 De hagaodi o de hagamaolunga go de magau,

gai de hagaodi o de lodo maolunga go tee sula o tangada.

19 E danuaa ange doo lodo maolalo gai e noho i magavaa o de hagaau aloha,

i dau vaevae goloa ne maua i de hebagi madali de gau hagamaolunga.

20 Tangada e daohia laa mee oona gu agoago ai e hagadagadaga age donu,

gai tangada e hagadonusia Tagi Maolunga e manuuia.

21 Tangada heiangi e hagabinga bolo se dangada e donu ange,

gai muna maamaane e hai ga hai ngaohie de agoago ange dangada.

22 De heiangi go de vai o de mouli ange gi gilaadeu gu gaavee,

aagai de lodo senga e hagaduasala gilaadeu e lodo ssenga.

23 Lodo o tangada heiangi e dagi ana muna e tala,

gai ana muna e maua i de usuusu ange dangada.

24 Muna a tangada abodonu e bei denga hooni,

e maimai ange gi tangada, ma de hagammahi dono angaanga.

25 E dahi haiava e dulagi be se haiava heohi ange gi tangada,

aagai e hano ga duu ange gi de magau.*Pro 14.12

26 De lodo o tangada e gaimee e hai ia gi hai hegau,

gai dono saalohia e hagammahi ange ia gi hai hegau.

27 Tangada e deai ono haigamaiana e hagatau de hai de baubau,

gai ana muna e bei de ahi e duungia laa mee alodahi.

28 Tangada hadu muna e hai ga dee heloongoi dangada,

gai tangada hai samu e hagabaubau magavaa o denga hai soa.

29 Tangada alasala e hagatale tangada e baa ange gi de ia,

ma de dagi ia i dahi haiava dee danuaa.

30 Tangada e hagadabadaba ina laa luoono mada

e maanadu de hai de baubau;

gai tangada e hagalloa ina laa luoono malaungudu

e noho e hai de baubau.

31 De biho sinasinaa e bei de hau mahamaha;

de mee nei e maua i daho tangada e heohi.

32 Tangada e golomagi ina laa ono lodo

e danuaa ange i dahi daane dau o de hebagi,

tangada e golomagi ina ono lodo i dono lili

e danuaa ange i taane e hagadee kii ina dahi aduhale.

33 Dangada e dada denga laagau,

aagai go Tagi Maolunga e hagamodu ina mee alodahi.