1 E danuaa ange dau gai de bagu pelaoaa gai e noho i de mommee iai de baba ma de malino,

i doo noho i dahi hale e hai ai taonga gai dangada iai e hagadaumee.

2 Tangada hai hegau heiangi e dagi naa tama hagadookaa dangada,

ma de kave de boolonga madali denga hai daina daane.

3 De anibada se mee ange gi denga selevaa, gai de ahi mmahi se mee ange gi denga goolo,

aagai Tagi Maolunga e hagatale dagodo lodo o tangada.

4 Tangada baubau e hagallongo muna a tangada baubau,

gai tangada hadu muna e hagallongo denga muna hagabaubau.

5 Tangada e hakadanga laa i tangada hagaau aloha,

e hagangadi mee de Maadua ne haia laa ia;

gai tangada e malangilangi laa i de duasala o dahi

e hagaduasala naa donu.

6 Denga mogobuna go de hau i honga biho o de gau madumaatua,

gai denga damana go de mahamaha o alaadeu dama.

7 De tala muna hagadubu e dee heohi ange gi tangada lodo senga,

gai e kii ange donu tee heohi de hadu muna o dahi dagi.

8 De ngadi gaavange hagasenga e bei de mee hai huuhuaa mee nii tangada ne gaavange,

gai ia e maanadu bolo mee alodahi aana e hai e hagadagadaga age.

9 Tangada e degi ange laa gi haisala o dahi e ssala de hagadau aaloha,

aagai tangada adi longo e vvae magavaa o denga hai soa.

10 Tangada heiangi e maua ange i de kave dono hagaheohi ina i e dahi hanonga,

i de hagailiilia o tangada lodo senga i e lau hanonga.

11 Tangada baubau e ssala de hai gi hai baasi dangada,

gai dahi dangada alasala e hai naa gi hano gi hagaduasala ina ia.

12 E danuaa ange doo hedae ange gi dahi bea hahine gu gaavee gee laa ana dama,

i doo hedae ange gi dahi dangada lodo senga e hai hegau laa i dono lodo senga.

13 Noo tangada e sui ange tanuaa i de baubau,

gai de baubau e dee hano gee naa donu i dono hale.

14 Taamada o de hagadaumee e bei de maoha o dahi bae e daohia vai,

deelaa ai, duudia de hagadaumee i mua de daamada.

15 Tangada e hagaheohi ina laa tangada haisala, gai e hagabaubau tangada heohi —

Tagi Maolunga e kino i luu hegau nei ngaadahi.

16 Ni haigamaiana aha de dahi sseene

a tangada lodo senga e hagao ai de heiangi,

gai e deai donu se heiangi i ono daha?

17 Ssoa abodonu e aloha i masavaa alodahi,

gai taina ne haanau ange gi de masavaa o de hai ngadaa.

18 Tangada senga e hagatoo donu e hagao muli a dahi dangada gee,

ma de hagatoo donu bolo go ia e hagao ina muli a dahi dangada gee.

19 Tangada e lodo laa e hagadaumee e lodo hogi i de haisala,

gai tangada e hagaduulia dahi haitoga maolunga e ssala donu huu dono hai ngadaa.

20 Tangada maanadu baubau e deai donu sana mee danuaa e gide,

gai tangada e daahangadia dangada i ana muna e duu ange naa gi de hai ngadaa.

21 Tangada e hagadili ina dahi dama lodo senga e daemaha ono lodo;

gai tamana o tangada lodo senga e dee malangilangi donu.

22 De malangilangi i lodo o tangada e bei de valaai danuaa,

aagai de daemaha lodo o tangada e hai ga deai ono mahi.

23 Tangada baubau e gaavee hagammuni de mee ngadi gaavange hagasenga,

ga hai gi dee sula de hagamodu heohi.

24 Tangada e dahi ono donu ange e daohi de heiangi i mada luoono mada,

aagai luu mada o tangada lodo senga e galo gi de bido laa o henua i lalo.

25 Tama lodo senga e hagadaemaha dono damana,

gai e hagammae lodo o de ia ne hanaua ia.

26 E dee danuaa de hai tangada heohi gi hagao ina ono mee tee haisala ai;

aabe go de hagaduasala denga dagi e haia de mee heohi.

27 Tangada e daohia laa dono alelo se dangada iloo mee,

gai tangada daudonu se dangada e donu.

28 Tangada lodo senga e dagodo be se dangada heiangi

noo ia e hagapuni dono ngudu,

gai e dagodo be se dangada iloo mee noo ia e daohi dono alelo.