1 Tangada e vvae gee laa ia ma dangada, e maanadu donu huu ia,

gai ia e hai baasi ange gi denga hagamodu heohi alodahi.

2 Tangada lodo senga e dee malangilangi i de hai gi donu ange ia,

aagai e lodo donu huu e tala ana mee e maanadu.

3 De masavaa naa huu e humai ai de baubau,

gai de hagangadi mee e humai hogi,

gai hagadogaa e humai hogi madali tee hagadubu.

4 Muna a tangada e tala e bei de vai gelo,

aagai tagelo o de heiangi e bei ssaalingaa vai e sali laa.

5 E dee danuaa doo hagabuni ange gi tangada baubau,

aabe go de hagamodu muna o tangada tigi haisala i mee dee heohi.

6 Muna a tangada lodo senga e hai ga hebagi dangada,

gai ana muna e hai ga daia ia.

7 Muna a tangada lodo senga e hagabaubau donu huu ia,

gai ana muna e nnoa donu huu ia.

8 Muna a tangada hai samu e bei denga amuamu gai mammami,

gai e hulo donu ga ulu gi lodo o tangada.

9 Tangada vaiduu i de hai ana hegau,

se daina niio tangada e oohaa mee.

10 De ingoo o Tagi Maolunga e bei de hale buibui makaga;

tangada heohi e savini ga hano aagena gai ia gu ola.

11 Goloa lagolago o de gau llava go delaadeu aduhale buibui;

gai gilaadeu e maanadu bolo e bei de buibui maolunga.

12 De hagaodi o de lodo maolunga o tangada go de magau,

gai de hagaodi o de lodo maolalo go de hagadubu.

13 Tangada e basa laa i mua dana noho ga hagallongo,

se dangada lodo senga ma de hagadogaa dangada.

14 Tangada e maua i de hagauda dono magi,

aagai goai e maua i de hagauda de mmae o de lodo?

15 Tangada heiangi e lodo e hai gi maua e ia de iloo mee,

gai luu dalinga o tangada heiangi e ssala de iloo mee.

16 De ngadi gaavange e hhuge ange de haiava o tangada,

gai e hai gi maua e ia i de duu i mada i mua o de gau aamua.

17 Tangada e daalaa dono heohi i mua, e dulagi be go ia e heohi,

ga dae ai gi de humai o dahi ga hai ssiilingaa muna.

18 De hai tada e hai gi dee hagadaumee dangada,

ma de vvae magavaa o de gau mmahi e hai baasi laa.

19 Tangada gu lili laa e makaga ange ono lodo i de aduhale buibui makaga,

gai de hagadaumee e bei baalanga hagamakaga o de hale buibui makaga.

20 Muna a tangada e aahe ange naa donu huu gi de ia;

gai ia e kave naa donu hua o ana muna e tala.

21 Muna a tangada iai ssauaa o de mouli aama de magau,

gai dangada e aaloha ai e gai naa donu huu alaadeu muna.

22 Tangada e gidee laa dahi bodu moona gu gidee dahi mee danuaa,

gai Tagi Maolunga gu abodonu ange gi de ia.

23 Tangada hagaau aloha e dangidangi,

aagai tangada lava e pada ana muna e basa ange ai.

24 Tangada e soa laa ono soa, e duu ange naa donu gi de hai ngadaa,

aagai e dahi dangada se soa

e kii ange de baa ange gi de ia i dono daina donu.