1 Tangada hagaau aloha e hai hegau laa i de mee heohi,

e danuaa ange i tangada lodo senga ma de hadu muna.

2 E dee danuaa de lodo o tangada i dahi mee gai e deai sono iloo mee,

gai be goai e hagamoolau e hano, e dee gidee naa e ia de haiava.

3 Tangada lodo senga e oha dono mouli,

gai ono lodo e hagabaubau Tagi Maolunga.

4 De lava o tangada e hai ga soa ono soa,

aagai ssoa o tangada hagaau aloha e tili naa ia.

5 Tangada tala hagadonu hhadu muna e dee haihai naa donu ga dee hagaduasala,

gai tangada e daalaa muna hhadu e dee ola naa donu.

6 E soa dangada e ssala de abodonu i dahi dangada maolunga;

gai dangada alodahi ni soa niio tangada e gaavange mee ngadi gaavange.

7 Dangada o tangada hagaau aloha e hagangadi mee ia,

gai ono soa e kii ange donu de hagammao gee i de ia!

Gai ga hagammahi naa donu ia ga dangidangi ange gi gilaadeu,

gai ia e dee gidee donu gilaadeu.*Muna Hebrew i kinei e dee iloo danuaa dono hagadoonunga.

8 Tangada e haia gi heiangi ia, e hagamogomogo dono mouli;

tangada e haia gi donu ange ia, e hagadagadaga age.

9 Tangada tala hagadonu hadu muna e hagaduasala donu,

gai tangada e daalaa denga muna hadu e magau donu.

10 Tangada lodo senga e dee heohi ange

gi de mouli i mee danuaa —

gai e kii ange donu de baubau

noo dahi dangada hai hegau e dagi de gau aamua.

11 Tangada maanetonu e dee moolau de lili,

gai ia e hagadubulia i dono dee anga ange gi de haisala ange o dahi gi de ia.

12 De bole o de hodooligi e bei de hagangolo o de laiono,

aagai dono abodonu e bei de mee suungia e hano iho laa gi honga helii.

13 Tama lodo senga e hagahai ngadaa dono damana,

gai de hine dau bodu lodo hagadaumee

e bei madaua vai e dee tuu laa de too iho.

14 Denga hale ma de lava ni mee ne bolo mai i daho denga maadua,

aagai de hine dau bodu heiangi se mee mai i daho Tagi Maolunga.

15 De vaiduu e hai e seni donu huu,

gai tangada ngadi noho e hiigai.

16 Be goai e daohia de hainga e buibui dono mouli,

aagai be goai e hagangadi mee ina ono haiava e magau donu.

17 Be goai e abodonu ange gi de gau hagaau aloha, e gaavange ana mee gi Tagi Maolunga,

gai Tagi Maolunga e hagao ange naa donu ana hegau.

18 Haelea dau dama, i de masavaa goi hanu ai haigamaiana;

aude lodo i dono magau.

19 Tangada moolau de lili e hagaduasala donu,

gai noo koe e hagaola ia, gai koe e ahe ange ga hagaola ia.

20 Kana ange hagalaangona muna bale ma de daohi denga agoago,

gai koe e sula naa ga se dangada heiangi i muli mai.

21 E lagolago hagatau i lodo o tangada,

aagai go hagatau donu huu a Tagi Maolunga e ssula.

22 De mee e heohi i de hai go de abodonu;

gai e danuaa ange de hagaau aloha o tangada i dono hai ga se dangada hadu muna.

23 De madagu i Tagi Maolunga e hano ga duu ange gi de mouli,

gai e hai tangada ga baba ono lodo, gai e dee duu ange gi de hai ngadaa.

24 Tangada vaiduu e velo ange dono lima gi lo te gumedi;

gai e dee maua i de hagaahe age gi dono ngudu!

25 Hagailiilia tangada doo mee, gi heiangi ai tangada lodo senga;

hagaseegina tangada heiangi, gai e kii ange naa dono iloo mee.

26 Tangada e vaivai haia dono damana ma de alualu dono dinana

se dama hagadookaa dangada ma teai sana hagadubu.

27 Dagu dama, noo koe e dee hagallongo ange gi denga agoago heohi,

gai koe e hano gee naa i muna o de iloo mee.

28 Tangada tala hagadonu hadu muna e hagangadi mee de hagamodu heohi,

gai de ngudu o tangada baubau e holo de baubau.

29 De hagaduasala e baba ange gi de gau doo mee,

gai de hagailiili se mee ange gi dua o de gau lodo ssenga.