1 De uvaini e bei tangada doo mee, gai mee mmahi e hai ga hagalongaa tangada;

be goai e dugua ange de mee nei gi dagina ia e dee heiangi.

2 De bole o de hodooligi e bei de hagangolo o de laiono;

tangada e haia ia ga lili e daa donu ga magau.

3 Tangada e hagaui gee i de hebagi se dangada hagadubu,

aagai de gau lodo ssenga alodahi e dee modu de hagadaumee.

4 Tangada vaiduu e dee hagabalabala dana veelenga i de masavaa hai veelenga,

gai e deai naa donu ana huamanu e gide i de masavaa o de hagihagi.

5 Hagatau i lodo o tangada e bei de vai gelo,

aagai tangada e donu ange laa e hai gi ssula age mee nei.

6 E soa dangada e maanadu bolo gilaadeu ni dangada e abodonu,

aagai e hai ngadaa donu i de gidee

dahi dangada e hai hegau i de mee abodonu.

7 Tangada heohi e hai hegau laa i de mee abodonu,

e hai naa ga manuuia denga dama e loomai i ono dua.

8 De hodooligi e noho i honga dono nohoanga e hagamodu ai muna,

e hili denga mee baubau alodahi i de masavaa aana e gidee ai.

9 Goai e maua i de hagadaba, “Au e gilimalali ogu lodo;

au e gilimalali, au e dee haisala donu”?

10 Denga mee hagahidi ma mee haide hadu muna,

ni mee niio Tagi Maolunga e kino ai.

11 Ngalungalue a tamaa gauligi e hagaago mai ono dagodo,

be ana hegau e gilimalali ma de heohi.

12 Luu dalinga e langona laa ma luu ganomada e gidee —

go Tagi Maolunga ne haia luu mee nei ngaadahi.

13 Aude lodo i de seni, koe kana hagaau aloha,

gai koe ala mage hai hegau gi lagolago ai au gai.

14 Tangada hagao mee e hagadaba, “E dee danuaa, e dee danuaa,”

gai ia e hano ga tala tuhi dagodo o de goloa aana ne hagao laa.

15 E hanu goolo, gai e lagolago hadu hagamogomogo,

aagai muna a tangada iloo mee e kii ange de hagao ngadaa i mee nei.

16 Gaavee de malo o tangada gu hagatoo donu e hagao muli a dahi dangada gee,

gai daohia de malo laa e hagadonu ai dana hagao muli a dahi dangada henua gee.*dahi dangada henua gee, aabe go dahi hahine dagodo haisala.

17 Denga gai e maua laa i de hadu muna e mammami,

aagai muli mai naa huu gai lo tono ngudu gu honu i denga giligili.

18 Au hagatau e ssula naa i dau kave muna bale,

ma taaginga danuaa i mua doo hano e hebagi.

19 Tangada hai samu e hagangadi mee de tali a tangada;

deelaa ai, aude hagabuni ange gi tangada vava de ngudu.

20 Tangada e basa baubau i dono damana aabe go dono dinana,

dono mouli e bei naa de laama e diinei laa i lo te gohu boo dangodango.

21 Mee a tangada ne moolau de kave i taamada,

e deai donu se manuuia iai i muli mai.

22 Aude hagadaba, “Au e sui ange donu hegau baubau a dahi!”

Koe haia Tagi Maolunga go dau tali, gai ia ga hagaola ai goe.

23 Tagi Maolunga e kino i denga mee hagahidi hadu muna,

gai ia e dee malangilangi i denga mee hagabau hagasenga.

24 Go Tagi Maolunga e dagina de haiava o tangada.

Gai dee hee ai naa de hai a dahi dangada e donu ange ai gi de haiava oona e hano ai?

25 De ngadi hagatoo donu dahi sigidaumaha dabu,

e bei ssele oou e noodia ai laa;

muli mai gai tangada gu dee baba ono lodo.

26 De hodooligi heiangi e nonu ga hili de gau baubau;

ia e hai de hagasii o de mee duuduu grain gi hano laa olaadeu elunga.

27 De hagasaalunga o tangada go de laama a Tagi Maolunga

e ssala ai laa gi gidee dagodo lodo alodahi o tangada.

28 De abodonu ma de hai hegau i de mee abodonu e buibui de hodooligi,

gai dono nohoanga hodooligi e duu ga makaga i dono hai hegau i de mee heohi.

29 De mahamaha o de gau mmodo go olaadeu mahi,

gai de mahamaha o de gau madumaatua go olaadeu biho sinasinaa.

30 Denga mee hagammae hagalagolagohia e kave gee de baubau i daho tangada,

gai de hagaduasala e hagagilimalali lodo o tangada.