1 Lodo o de hodooligi e bei ssaalingaa vai i lo te lima o Tagi Maolunga;

gai ia e hai gi hano be go hee aana e lodo e hai gi hano aagena.

2 Tangada e maua i de maanadu bolo ono haiava e heohi,

aagai Tagi Maolunga e hagahidi dagodo o ono lodo.

3 De hai hegau i de heohi ma de hagamodu heohi

e kii ange de hagamogomogo i daho Tagi Maolunga i ssigidaumaha.

4 Luu mada hagamaolunga ma de lodo maolunga

go de laama a tangada baubau, gai e haisala donu.

5 Hagatau a tangada hai mee e hai ga lagolago ana mee,

aagai dangada alodahi e hagamoolau e hagaau aloha naa.

6 Denga goloa hagamogomogo e maua i de hadu muna

e bei mama o denga vai e moolau laa de lilo, gai e bei ssele o de magau.

7 De alasala o de gau baubau e daa naa gilaadeu ga maakau,

i hiidinga gilaadeu e dee llodo e hai de mee heohi.

8 De haiava o tangada gu haisala e bigo,

aagai hegau a tangada gilimalali e heohi.

9 E danuaa ange de noho o tangada i tua de hale,

i dono noho i lo te hale madali dahi hahine e lodo hagadaumee.

10 Tangada baubau e lodo mmao i de baubau,

gai ia e dee abodonu ange gi tangada e baa ange gi de ia.

11 Noo gu hagaduasala tangada doo mee, gai tangada lodo senga gu kii ange de heiangi;

gai de masavaa naa huu e agoago ange ai tangada heiangi, gai ia gu iloo mee.

12 De Ia Heohi e iloo dagodo o de hale o tangada baubau,

gai ia e hagaduasala naa de gau baubau.

13 Be goai e bonodia luoono dalinga, i de masavaa o de gau hagaau aloha e tangi ai,

gai e deai naa hogi dangada e balea ange ia, i de masavaa oona e dangi ai.

14 De gaavange dahi mee ngadi gaavange hagammuni, e hagasili de lili o tangada,

gai de mee ngadi gaavange hagasenga hai hagammuni, e hagasili de bole laumalie.

15 De masavaa naa huu e sula ai de hagamodu heohi, gai tangada heohi gu malangilangi,

aagai e hai ga maatagu gilaadeu e haia de baubau.

16 Tangada e dee maanetonu laa,

e dau naa madali de hagabuulinga o de gau maakau.

17 Tangada e lodo laa e hagamalangilangi ia, e hagaau aloha naa,

gai be goai e nnoo ange laa gi uvaini ma lolo, e dee maua donu gi lava.

18 Tangada baubau go de mee hagaola o tangada heohi,

gai tangada e dee hai laa hegau i de mee abodonu, e sui tangada heohi.

19 E danuaa ange de noho o tangada i de vao,

i dono noho madali de hine lodo hagadaumee ma de nanu.

20 Lo te hale o tangada heiangi iai goloa hagamogomogo ma lolo,

aagai tangada lodo senga e hai moumou ana mee.

21 Tangada e hai hegau laa i de mee heohi ma de abodonu,

e gidee naa e ia de mouli, ma de heohi aama de hagadubu.

22 Tangada heiangi e hebagi ange naa gi dahi aduhale o denga daane mmahi,

gai ia e oha naa de mommee buibui makaga alaadeu e tali ange laa aagena.

23 Tangada e daohia dono ngudu ma ana muna e tala,

e hagaola dono mouli i de hai ngadaa.

24 Tangada basa hagasoenga se dangada lodo maolunga —

dono ingoo go de lodo maolunga, gai ia e hai hegau hagamaolunga.

25 Mee o tangada vaiduu e lodo ai, e daa donu ia gi magau,

go hiidinga ia e dee lodo e hai hegau.

26 De laangi alodahi gai ia e hagadaga ange dono lodo ange gi mee,

aagai tangada heohi e abodonu i de gaavange mee.

27 Ssigidaumaha a tangada baubau se mee hakino gee;

gai e kii ange donu de hakino gee noo se mee ne hai i de maanadu baubau!

28 Tangada tala hagadonu hadu muna e magau naa donu,

aagai muna a tangada e hagalaangona e daakodo ga hano ai.

29 Tangada baubau e hagassee,

aagai tangada e heohi laa, e hagasaele dono hai e seesee ai.

30 E deai donu se heiangi, e deai donu se donu ange,

gai e deai hogi se hagatau e maua i de hai baasi ange gi Tagi Maolunga.

31 De hoosa e hagadabena ange gi de hebagi,

aagai go Tagi Maolunga e dugu ina ange gi kii dahi.