1 De ingoo danuaa e hagamogomogo ange i goloa lagolago,

de hagadubu e danuaa ange i goolo aabe go selevaa.

2 Tangada lava ma tangada hagaau aloha se dagodo daudahi i de mee nei:

go Tagi Maolunga ne haia gilaau ngaadahi.

3 Tangada maanetonu e mmuni i de masavaa aana e gidee ai de mee hagamanavasaa,

aagai tangada lodo senga e hagassoe donu huu i dono haiava,

gai ia e duasala ai naa donu.

4 De hagaoanga o de lodo maolalo ma de madagu i Tagi Maolunga,

go de lava ma de hagadubu, aama de mouli.

5 Haiava o tangada hadu muna iai manu daladala ma denga sele,

aagai tangada e dagidiiloo dagodo o ono lodo e hagammao gee i mee nei.

6 Hagaabo ina ange tama gi de haiava oona e hano ai,

gai de masavaa naa huu oona e madua age ai, gai ia e dee hano gee ai donu.

7 Tangada lava e dagi de gau hagaau aloha,

gai tangada muli se dangada hai hegau

niio tangada ne gaavange sseene gi de ia.

8 Tangada e dooa de baubau e hagihagi naa de hai ngadaa,

gai de laagau o de lili e hagaduasala ai laa dangada e hagadeai naa.

9 Tangada abodonu e manuuia naa donu,

go hiidinga ia e gaavange ana gai gi de gau hagaau aloha.

10 Haia gi hano gee tangada doo i mee, gai gu deai hogi se hebagi,

ma de hagadaumee aama de hagadogaa.

11 Tangada e lodo laa gi gilimalali ono lodo, gai ana muna e maamaane,

e hai naa ga se soa niio de hodooligi.

12 Luu mada o Tagi Maolunga e daumada tangada iloo mee,

aagai e hai gi dee ssula muna a tangada e dee hai hegau i de muna abodonu.

13 Tangada vaiduu e hagadaba, “E dahi laiono i duaahaho!”

aabe, “Au e daia naa ga magau i honga denga haiava!”

14 De ngudu o de hine dagodo haisala e bei de geelinga gelo,

gai tangada i lalo de bole o Tagi Maolunga e doo ange naa gi lo te geelinga laa.

15 De lodo senga e dagodo i lodo o de gauligi,

aagai de laagau haele e aau gee de lodo senga mai i ono daha.

16 Be goai e vaivai haia tangada hagaau aloha gi kii ange ai dono lava,

ma tangada e ngadi gaavange mee gi tangada lava —

gilaau ngaadahi e hagaau aloha donu.

17 Huli ange doo dalinga hagalaangona muna a de gau heiangi,

gai haia gi dagodo de iloo mee i oo lodo,

18 gai e hagamalangilangi dau daohi muna nei i oo lodo,

gai koe gi baba ange e tala muna nei alodahi.

19 Au e agoago adu goe anailaa nei,

gi hagadonusia ai e goe Tagi Maolunga.

20 E aha, e dee e matolu muna heiangi aagu gu sisi adu gi de goe,

go muna bale ma de iloo mee,

21 e agoago adu ai goe i de muna abodonu ma de heohi,

gi maua ai e goe i de tala ange de muna heohi gi tangada ne haia goe gi hano?

22 Aude gaiaadia mee o tangada hagaau aloha,

go hiidinga ia e hagaau aloha;

aude hai baasi ange gi tangada duasala i de mommee hagamodu muna,

23 i hiidinga Tagi Maolunga e bale ange naa donu gilaadeu,

ma de hai gi hai ngadaa mouli o dangada e gaiaadia alaadeu mee.

24 Aude hai soa ange gi tangada e moolau laa de lili,

gai gi dee hagabuni ange gi tangada lillili,

25 aabe gi ago ange i ana dahulinga,

gi dee noodia ai goe i ana dahulinga.

26 Koe gi dee se dangada e hagatoo donu e hagao muli a dahi dangada,

aabe go de daohi age de mee e hagao ai muli a dahi dangada gee;

27 noo koe e dee maua i de hagao,

gai gu aha gu dugu ange ai gi gaavee gee doo moenga?

28 Aude hagangaalue ina denga goinga madagidagi,

a denga dubuna gu lava laa i de hagatuu.

29 Koe e gidee laa dahi dangada labagau i de hai ana hegau?

Ia e hai hegau naa i mada i mua o denga hodooligi;

ia e dee hai hegau ange naa donu gi hanu ngadi dangada.