1 De masavaa naa huu oou e noho ai e gaimee madali dahi dagi,

gai koe diiloo gi danuaa denga mee i oo mada i mua;

2 gai koe duudia mai au mee e gai,

noo koe se dangada aagai.

3 Aude lodo donu i ana gai mammami,

go hiidinga ni gai e daahangadia goe.

4 Aude hagadalea ange gi denga goloa lagolago;

gai koe gi heiangi ga tuu de hai mee nei.

5 De masavaa donu huu aau e gidee ai, gai gu dee maaleva,

go hiidinga mee nei e llele ga hulo,

bei de igele e lele laa ga hano gi lo te moana i lunga.

6 Aude gaina gai a tangada gailalopoli,

aude lodo donu i ana gai mammami;

7 go hiidinga ia e bei tangada e maanadu laa de hagaoanga.

Ia e hai adu naa gi de goe, “Gaimee ma de unu,”

gai ia e dee lodo donu koe gi gaimee.

8 Koe e hagalueia mai naa au momo mee gu gai,

gai teai haigamaiana dau tuhi ange ia.

9 Aude basa gi langona e tangada lodo senga,

go hiidinga ia e hagangadi mee donu au muna heiangi.

10 Aude hagangaalue ina denga hadu goinga madagidagi

aabe gi hano gi lodo alahenua

o denga gauligi gu deai olaadeu damana,

11 go hiidinga delaadeu Ia Hagaola e mmahi,

ia e bale ange naa donu gilaadeu e hai baasi adu ai gi de goe.

12 Haia gi donu ange goe gi denga agoago,

gai koe gi hagalaangona muna o de iloo mee.

13 Koe gi dee daohia de haele o dau dama;

ia e dee magau naa donu, noo koe e hagaili ia i dahi laagau.

14 Noo koe e hagaili ia i de laagau,

gai koe e hagaola naa ia mai i de mommee o de gau maakau.

15 Dagu dama, noo koe e heiangi oo lodo,

gai au e lodo danuaa donu;

16 gai au e malangilangi naa,

i de masavaa aau e tala ai de mee heohi.

17 Aude lodo gaiaa ange gi de gau haisala,

aagai madagu mmao i Tagi Maolunga i taiao ga boo ai.

18 Ni muna abodonu, e dahi donu au tali ange gi de masavaa e humai,

gai dau tali e dee helui naa donu.

19 Dagu dama, hagalaangona agu muna gi heiangi ai goe,

gai oo lodo gi daudali i de haiava heohi.

20 Aude hagabuni ange gi gilaadeu e unumia uvaini lagolago,

aabe go de gau aagai e gaina laa kano manu;

21 go hiidinga de gau ssenga ma de gau aagai e hagaau aloha naa,

gilaadeu e llodo e sseni e kahu i malo masaesae.

22 Hagallongo ange gi doo damana ne hagadili ina goe,

gai koe gi dee hagangadi mee ina doo dinana i dono masavaa gu madumadua ai.

23 Hagao ina de mee abodonu, gai koe gi dee hagao ina gi daha,

gai hagao ina de heiangi, ma agoago heohi, aama de donu ange danuaa.

24 Tamana o tangada heohi e laumalie dono malangilangi,

gai tangada e hagadili ina laa dahi dama heiangi e lodo danuaa i de ia.

25 Haia gi malangilangi luoo maadua,

gai de hine ne hanaua goe gi lodo danuaa.

26 Dagu dama, dugua mai oo lodo gi de au,

gai luoo mada gi diiloo ogu haiava.

27 De hine hai be se manu e bei de geelinga gelo,

gai de hine dau bodu dagodo haisala e bei de vai geli mada damaa mee.

28 Ia e bei tangada gaiaa e mmuni laa ma e tali ai,

ia e hai naa ga soa dangada e dee hai hegau i de mee abodonu.

29 Goai e hai ngadaa? Goai e daemaha?

Goai e hagadaumee? Goai e nanu?

Goai gu lagohia gai teai hiidinga? Goai gu mmea lodo luoono ganomada?

30 Go gilaadeu e daulooloa delaadeu nnoho i denga uvaini,

ma gilaadeu e hulo ga mami denga uvaini hoou gu hilo laa.

31 Aude galo ange gi diiloo uvaini i lo te ubu i de masavaa e mmea ai, ma de ebuebua,

gai e hagallongo danuaa ai i de hano iho laa lo te hakii.

32 Muli mai gai e kadi bei de labodo,

ma de hagammau bei de labodo hagammau.

33 Luoo mada e gidee naa denga mee hagamaatagu,

gai koe e senga ange naa lo too biho.

34 Koe e bei naa tangada e seni laa i honga de moana,

ia e dagodo ma e seni i ulu dahi bou.

35 Koe e hagadaba naa, “Gilaadeu ne hagaili au,

aagai au tee mmae donu!

Gilaadeu ne dugidugi au, aagai au tee langona iho donu.

Go aahee maa oogu e alahage ai,

gi maua ai e au i de ssala ange hanu mee unu?”