1 Aude lodo gaiaa ange gi de gau baubau,

aabe gi lodo e hagabuni ange gi gilaadeu;

2 go hiidinga gilaadeu e hagatau de hai e vaivai hai ai dangada,

ma de pasa i delaadeu hai e hagahai ngadaa ai dangada.

3 De hale e hagaduu i de heiangi,

gai e hagaduu ga makaga i de donu ange;

4 gai go de iloo mee e hhao ai ga hoohonu ono aabi

i denga goloa hagamogomogo ma de mahamaha.

5 Tangada heiangi e mmahi mmao,

gai tangada iloo mee e hai ga hagadaga ange de mmahi.

6 Denga muna bale danuaa e maua i de dagi goe i de hebagi,

gai doo kii e hidi mai i de soa o oo dangada hagasaele.

7 De heiangi e hano laa honga de biho o tangada lodo senga;

gai ia e dee maua i de hhanga dono ngudu i de haitoga o de aduhale.

8 Tangada e haia denga hagatau baubau

e hagabinga bolo se dangada e vaivai dagodo.

9 Hagatau a tangada lodo senga e haisala,

gai dangada e kino i tangada doo mee.

10 Noo koe e dee lodo mmahi i de masavaa hai ngadaa,

gai e sogoisi oo mahi.

11 Hagaola ina gilaadeu gu kave laa e daa gi maakau;

gai daohia gilaadeu e hulo laa

gi de mommee olaadeu e daa ai gi maakau.

12 Noo koe e hagadaba, “Tilo, gimaadeu tee iloo donu,”

e aha, de ia e hagahidi ina lodo o dangada e dee iloo e ia de mee nei?

E aha, de ia e hagaloosia adu doo mouli e dee iloo e ia de mee nei?

Gai ia e dee hagao ange naa dahi ma dahi gi bei dagodo o ana hegau?

13 Dagu dama, gaina denga hooni, go hiidinga e danuaa,

denga hooni hoou mai i de mommee hai hooni e maimai.

14 Koe gi iloo hogi bolo de heiangi e bei de mee maimai ange gi doo hagasaalunga;

noo koe gu maua de heiangi, gai e dahi au tali ange gi masavaa e humai,

gai dau tali e dee tuu naa donu.

15 Tangada baubau, aude noho gi daalia e hai baasi ange gi tangada heohi,

aude vaivai haia dono mommee noho;

16 gai ga baguu naa donu tangada heohi i e hidu hanonga, gai ia e hidi age ange naa,

aagai de gau baubau e maakau naa i de masavaa hai ngadaa.

17 Aude malangilangi i de masavaa o doo hagadaumee e baguu ai,

gai koe gi dee lodo danuaa i masavaa oona e dai baguu ai;

18 kana gidee naa e Tagi Maolunga, gai ia gu dee malangilangi,

gai ia gu dee hagaduasala ia.

19 Aude manavasaa i hiidinga o olaadeu e haia de baubau,

aude lodo gaiaa ange gi de gau baubau;

20 go hiidinga tangada baubau e dee daulooloa donu dono mouli,

gai de laama a tangada baubau e moolau naa donu de diinei.

21 Dagu dama, koe gi madagu i Tagi Maolunga ma de hodooligi,

gai koe gi dee hagabuni ange gi de gau hagamaanege,

22 go hiidinga e daa hagalele naa donu delaau oha mee nei,

gai goai e iloo be se hai ngadaa bee hee alaau e gaamai?

E dee se mee danuaa de hilihili dangada i de masavaa e hagamodu ai muna.

24 Be goai e hai ange gi tangada gu haisala, “Koe e dee haisala” —

dangada e hagamalaia naa ia,

gai denga huaahenua e kino naa i de ia.

25 Aagai dangada e hagaseegina tangada gu haisala,

e laumalie naa delaadeu manuuia.

26 Tangada e daalaa adu de muna abodonu

e bei de oso de usu o tangada.

27 Haia gi lava au hegau i duaahaho ma de hagadabena au veelenga;

muli mai, gai koe ga hagaduu doo hale.

28 Aude hagabaubau ina tangada e baa adu gi de goe i teai hiidinga,

aabe gi daahanga ina dangada i au muna.

29 Aude hagadaba, “Au e hai ange naa gi de ia ana mee ne hai mai gi de au;

au e sui ange naa donu ana mee ne hai.”

30 Au ne hano laa gaogao de veelenga a tangada vaiduu,

ma de veelengaa grape a tangada senga;

31 gai tilo, gu ssomo ai denga manu daladala ma manu dabeo,

gai de bae i luu baasi gu maoha.

32 De masavaa aagu ne gidee ai ma de maanadu dagodo o de mee nei,

gai au gu ago dahi mee i agu mee ne gidee:

33 de damaa seni iho, ma de damaa mmoe luoo mada,

ma de damaa ulunga ange gi luoo lima e hagamabu ai,*Pro 6.10-11

34 gai de hagaau aloha e duu adu naa gi de goe bei tangada gaiaa,

gai tuasala bei taane gu hagauda ono goloa hebagi.