25
Hanu muna hagasengasenga a Solomon
1 Aanei ange hanu muna hagasengasenga a Solomon, a denga daane hai hegau o de hodooligi go Hezekiah i Judah ne langa.
2 De mahamaha o de Maadua go dana hai gi dee iloo dahi mee,
gai de mahamaha o denga hodooligi go delaadeu ssala gi iloo dahi mee.
3 De maolunga o de langi ma de gelo o henua i lalo,
e bei dagodo maanadu i lodo o de hodooligi e dee maua gi iloo.
4 Aaua gee denga mee baubau mai i denga selevaa,
gai de labagau o denga selevaa gu maua i de hagaduu ai dahi mee danuaa,
5 aaua gee de gau baubau mai i daho de hodooligi,
gai dono nohoanga hodooligi e hagaduu naa ga makaga i de mee heohi.
6 Aude hagamaolunga ina goe i mada i mua o de hodooligi,
aabe gi hagahedaea ange goe gi de gau maolunga;*Luke 14.8-10
7 e danuaa ange noo ia e hai adu, “Gage mai gi kinei,”
i dana hagamaolalo goe i mada i mua o dahi dangada aamua.
Noo koe gu gidee dahi mee,
8 gai koe aude hagamoolau gi gaavange gi de hainga,
gai ni aha naa aau e hai i muli mai,
noo dahi dangada e hai goe ga dogaa?
9 Noo gooluu ma tangada e baa adu gi de goe gu dee heloongoi,
gai koe gi dee daalaa ange ana muna gi dahi dangada gee,
10 kana langona e dahi au muna gai ia ga hagadogaa goe,
gai au hegau baubau e dee maua naa donu gi ngalo.
11 Muna e tala laa i de masavaa heohi
e bei denga aabele goolo e hagatau laa i honga gaini selevaa.
12 Tangada heiangi e hagaseegina laa tangada e lodo laa e hagallongo ana muna,
e bei de hakai goolo aabe se mee hagalaagii goolo.
13 Tangada adi muna e hai hegau laa i de mee abodonu,
e bei denga snow e hagamaluulu ina laa i de masavaa o de hagihagi:
ia e hagamaamaane lodo o ono dangada aamua ne haia ia gi hano.
14 Tangada e tala tuhi ana mee ngadi gaavange tigi gaavange laa,
e bei denga giliiga ma de madangi e deai laa se langi e pala iho ai.
15 De golomagi lodo e maua i de sui lodo o dahi dagi,
gai muna maamaane e maua i de hhadi de ivi makaga.
16 Noo koe e gidee hanu hooni, gai koe hagabaulia donu huu au mee e gai,
kana hagalueia goe i de gona odi de lagolago au mee e gai.
17 Aude hagamau doo hano gi de hale o tangada e baa adu gi de goe,
kana goso ia i de goe, gai ia gu kino i de goe.
18 Tangada tala hagadonu hadu muna e hagabaubau ina laa dahi dangada,
e bei de laagau hebagi be go de gadilaasa, aabe go tao kangi o de mee hholu.
19 Dau hagadonu tangada e dee hai hegau i de mee abodonu i de masavaa hai ngadaa,
e bei dagodo o de niho bobo aabe go de vae gu maaguluaa laa.
20 Tangada e daahili ange gi tangada e daemaha ono lodo,
e bei tangada e hagaui ina malo i de laangi hagamagalili,
aabe go denga vinegar e llingi ange laa gi honga soda.
21 Noo doo hagadaumee gu hiigai, gai koe haangai ina ange ia;
noo ia gu hieunu, gai koe hagaunumia ange ia.*Rom 12.20
22 Gai koe e hagabudubudu ange naa denga maga ahi gi honga dono biho,
gai Tagi Maolunga e hagao adu naa goe.
23 De madangi mai i ngaiho e gaamai de langi;
gai tangada hai samu e hai dangada ga llili.
24 E danuaa ange de noho o dahi i tua dahi hale,
i dono noho i lo te hale madali dahi hahine lodo hagadaumee.
25 Denga longo danuaa mai i dahi henua mmao,
e bei denga vai maluulu ange gi tangada gu hieunu laa.
26 Tangada heohi gu hagallongo ange laa e tangada baubau,
e bei dahi saalingaa vai gu belabela ina laa
aabe go de vai geli gu hakino laa.
27 E dee danuaa de gai gi lagolago hooni,
e dee danuaa hogi ssala doo hagadubu i daho tangada.
28 Tangada e dee maua laa i de golomagi ono lodo,
e bei de aduhale gu maoha laa dono buibui.