1 De hagadubu e dee heohi ange gi tangada lodo senga,

e bei de loiho o denga snow i de masavaa mahanahana

aabe go de pala de langi i de masavaa o de hagihagi.

2 De hagamalaia gai teai hiidinga e dee duu adu naa donu gi de goe,

bei de sparrow e ngadi gabagaba laa,

aabe go de swallow e ngadi lele saele laa.

3 Taula e hagailiili ai se mee ange gi de hoosa,

de uga nnoa se mee ange gi de ngudu o dahi donkey,

gai de laagau se mee ange gi dua o de gau llodo ssenga.

4 Aude basa ange gi tangada lodo senga

gi bei dagodo o dono lodo senga,

koe kana bei ono dagodo.

5 Basa ange gi tangada lodo senga gi bei dagodo o dono senga,

gi dee maanadu ai ia bolo ia e heiangi.

6 De hai gi hano dahi dangada lodo senga gi hagailoo ina ana muna,

e bei donu de duuduu luu vae o dahi dangada,

aabe go dana hagahai ngadaa donu huu ia.

7 Muna hagasengasenga a tangada lodo senga,

e bei luu vae o tangada balagelage e ngadi tagi laa.

8 Tangada e hagadubu laa tangada lodo senga,

e bei de nnoa ange dahi hadu gi lo te buada.

9 Muna hagasengasenga a de gau llodo senga,

e bei de mee duiduia i lo te lima o dahi dangada senga.

10 Dau hagahai hegau tangada lodo senga, aabe go dahi dangada gu dae mai laa gi oo daha,

e bei tangada e dilia de mee hholu e hagalagolagohia ai dangada.

11 Tangada lodo senga e ahe ange ga hai ana hegau senga,

e bei de gaaduu e ahe ange laa ga gai ono hagalueia.*2 Pe 2.22

12 Tangada lodo senga e kii ange de dahi ana tali

i tangada e maanadu bolo ia e heiangi.

13 Tangada vaiduu e hagadaba, “E dahi laiono i honga de haiava,

e dahi laiono e hano saele laa honga denga haiava!”

14 Tangada vaiduu e hulihuli saele i honga dono moenga,

bei de abaaba e hulihuli saele laa gai e pigi ange gi ono mee hagamakaga.

15 Tangada vaiduu e velo ange dono lima gi lo te gumedi,

gai e dee maua donu e ia i de hagaahe age gi dono ngudu.

16 Tangada vaiduu e maanadu bolo ia e heiangi ange

i e dogohidu dangada maanetonu i alaadeu muna e tala.

17 Tangada e badai laa i de masavaa o dangada e hagadaumee ai,

e bei tangada e daangia laa luu dalinga o de gaaduu.

18 Tangada hai mee senga e dilia laa denga dao ula

ma dao o de mee hholu hagamaakau laa,

19 se dangada e daahanga ina tangada e baa ange gi de ia,

ga hai ange, “Au ne hakadanga adu donu huu!”

20 De ahi e made naa noo e deai lahhie;

noo gu deai dangada e hai samu, gai gu dee hagadaumee hogi dangada.

21 Denga dalaa ubu e hai ai de maga ahi, gai lahhie e dahu ai de ahi;

e bei ai hogi, tangada lodo hagadaumee e hai ga hebagi dangada.

22 Muna a tangada hai samu e bei denga amuamu gai mammami;

gai e hulo naa ga ulu gi lodo o tangada.

23 De hagasegesege ange tangada i au muna

gai oo lodo e dee se muna abodonu,

e bei de gumedi ne hai laa i gelegele,

ma gu hagamalamalama laa daha.

24 Tangada e hagammuni dagodo o ono lodo i ana muna e tala,

aagai ono lodo e dagodo ai de hadu muna.

25 Ga basa hagamalangilangi naa donu ia, gai koe aude hagadonusia ana muna,

i hiidinga ono lodo e honu i maanadu hakino gee.

26 Ia e hagammuni dono kino i de hadu muna,

aagai dangada soa e gidee naa ana hegau baubau.

27 Tangada e gelia laa dahi geelinga e doo ange naa gi ono lodo,

gai tangada e hagadigelia dahi hadu, de hadu laa e ahe mai naa ga dau i de ia.

28 Tangada e daalaa muna hhadu e kino i dangada aana e hagabaubau,

gai tangada e hagasegesege ina ange dangada e hai naa ga hai ngadaa dangada.