27
1 Aude basa hagasoenga i dagodo o daiao,
go hiidinga koe e dee iloo be ni aha e hai i dahi laangi.*Jms 4.13-16
2 Dugua ange dahi dangada gee gi duuhia goe, e dee go koe e duuhia goe;
dahi dangada gee gi duuhia goe, e dee go koe.
3 De hadu e daemaha, gai denga gelegele ni mee daemaha,
aagai de mee bole o tangada lodo senga
e daemaha ange i luu mee nei ngaadahi.
4 De lili e kona de alasala, gai de bole e kii ange donu de baubau,
aagai goai e maua i de hai baasi ange gi de maagoda?
5 E danuaa ange doo hano gi daho tangada ga hagasee ai ia
i de hagammuni doo aloha i de ia.
6 Koe e maua i de hagadonu doo soa i dana hagasee goe,
aagai tangada e kino i de goe e lagolago ana hanonga e oso ai goe.
7 Tangada gu bosu laa e kino i hooni,
aagai denga mee mmala e mami danuaa ange gi tangada e hiigai.
8 Tangada e hano gee i dono hale,
e bei de manu lele e tili laa dono hoohanga.
9 Lolo ma vai hagamanongi e hagamalangilangi tangada,
gai de manongi o ssoa o tangada go ana muna bale danuaa.
10 Aude dilia doo soa ma ssoa o doo damana;
aude hano gi de hale o doo daina i de masavaa oou e hai ngadaa ai.
E danuaa ange doo hano gi daho tangada e baa adu laa gi de goe
i doo hano gi doo daina e mmao gee laa.
11 Dagu dama, koe gi heiangi, gi malangilangi ai au;
gi maua ai e au i de basa ange gi tangada e hagangadi mee ina au.
12 Tangada maanetonu e mmuni i de masavaa aana e gidee ai de mee hagamanavasaa,
gai tangada lodo senga e hagasoe donu huu, ga hagaduasala ai donu huu ia.
13 Gaavee de malo o tangada gu hagatoo donu e hagao muli a dahi dangada gee,
gai daohia de malo laa e hagadonu ai dana hagao muli a dahi dangada henua gee.*dahi dangada henua gee, aabe go dahi hahine dagodo haisala.
14 Tangada e oo laa ga hagaboo ange gi tangada e baa ange gi de ia i boo taiao,
dana hagaboo e hagabinga bolo se hagamalaia.
15 De hine dau bodu lodo hagadaumee
ma denga madaua e too iho laa i de laangi bala langi se dagodo daudahi;
16 gai de daohi ia gi dee hagadaumee e bei dau hagatale de daohi de madangi,
aabe go de daohi gi dee ssali lolo i lo too lima madau.†Muna Hebrew i de gubu nei e dee iloo danuaa dono hagadoonunga.
17 Denga iron e hakaa denga iron,
gai dahi dangada e hakaa tangada ange laa.
18 Tangada e bolia ange de fig e gaimee naa i ono hua,
gai tangada e diiloo ange dono dangada aamua e hagadubulia naa.
19 Tangada e gidee danuaa dono ada i lodo vai,
gai maanadu a tangada e hagaago mai ono dagodo.
20 De mommee o de gau maakau ma Abaddon e dee maua donu gi hoohonu,
gai luu ganomada o tangada e dee maua hogi gi lava ana mee e tilo.
21 De anibada se mee ange gi denga selevaa, gai de ahi mmahi se mee ange gi denga goolo,
aagai dangada e gidee danuaa dagodo o tangada i de masavaa alaadeu e tuhi ai ia.
22 Ga dugidugia naa donu e goe tangada lodo senga i lo te mommee tugi,
i magavaa o denga grain,
gai e dee maua donu i de aau gee de lodo senga i ono daha.
23 Haia gi iloo e goe dagodo o dau hagabuulingaa ssiibi,
ma de hagaloosi gi danuaa au manu haangai;
24 go hiidinga de lava e dee maua gi dagodo ga hano ai,
gai dahi nohoanga hodooligi e dee maua hogi gi dagodo i denga atangada alodahi.
25 De masavaa naa huu e aau ai denga helii mmasa, gai denga helii hoou gu matili age,
gai denga helii i honga denga duuduu e hagabudu naa;
26 huluhulu o denga ssiibi e hai ai oo malo,
gai denga guudi e maua i de hagao e hagao ai dahi alahenua.
27 Koe e lagolago naa au vai uu guudi e haangai ai dangada i doo hale,
ma de gaimee ai oo haahine hai hegau.