1 Tangada baubau e savini naa ga hano,

e dee galemu donu teai dangada e dolohia ia,

aagai tangada heohi e lo taane bei de laiono.

2 De masavaa naa huu o de henua e haisala ai, gai gu soa dangada e dagina,

aagai tangada e donu ange ma de iloo mee e hai ga nnoho paba dangada.

3 Tagi e vaivai haia laa de gau hagaau aloha,

e bei de langi maadolu e haia laa ga deai gai.

4 Gilaadeu e dee daudali laa i de hainga e tuhi de gau baubau,

gai dangada e daudali laa i de hainga e hai baasi ange gi gilaadeu.

5 De gau baubau e dee tonu ange gi dagodo o de hagamodu heohi,

aagai gilaadeu e saalaa Tagi Maolunga e honu delaadeu tonu ange.

6 Tangada hagaau aloha e hai hegau laa i de mee heohi

e danuaa ange i tangada lava e dee hai hegau laa i de mee abodonu.

7 Tangada e daudali laa i de hainga se dama heiangi,

aagai tangada e hagabuni ange gi de gau aagai e hagadogaa dono damana.

8 Tangada e haia dangada gi hagao dahi mee laa honga mee aama mee gaavange gi kii ange ai dono lava,

e hagabudu naa donu huu mee laa ga dugu ange gi dahi dangada gee,

go tangada e ngadi gaavange mee gi de gau hagaau aloha.

9 Noo tangada e dee hagallongo ange gi de hainga,

gai ana dalodalo e hakino gee donu hogi.

10 Tangada e dagina ange tangada heohi gi de baubau, e doo ange naa gi lo tana sele;

aagai tangada e dee haisala e kave naa de boolonga danuaa.

11 Tangada lava e maanadu bolo ia se dangada heiangi,

aagai tangada hagaau aloha e donu ange laa, e iloo dagodo o tangada lava.

12 De masavaa naa huu o de gau heohi e kii ai, gai dangada gu malangilangi;

aagai de masavaa o de gau baubau e ssula ai, gai dangada e hulo ga mmuni.

13 Tangada e hagamuunia ono haisala e dee hagadagadaga ange donu,

aagai tangada e daalaa ma de tili ono haisala, de Maadua e abodonu ange naa gi de ia.

14 Tangada e madagu laa i Tagi Maolunga i masavaa alodahi e manuuia donu,

aagai tangada e hagamakaga ina ono lodo e duu ange naa gi de hai ngadaa.

15 Tangada baubau e dagina laa de gau hagaaloha

e bei de laiono e hagangolo laa aabe go de bea e hebagi ange laa gi tangada.

16 Tagi e dee donu laa e vaivai hai dangada;

aagai tangada e kino laa i goloa gaiaa e daulooloa naa dono mouli.

17 Tangada e dee baba laa ono lodo i dana daa tangada ga magau,

e silivaahea saele naa ga dae ai gi dono magau;

gai e deai naa donu se dangada e balea ange.

18 Tangada e hai hegau i de mee heohi e ola donu,

aagai tangada e dee heohi ana hegau,

e moolau naa donu dono duu ange gi de hai ngadaa.

19 Tangada e hagabalabala ina dono alahenua, e lagolago ana gai,

aagai tangada e ngadi hano saele laa e hagaau aloha naa donu.

20 Tangada e hai hegau laa i de mee abodonu e manuuia,

aagai tangada e hagamoolau laa e hai gi lava ia, e dee haihai naa donu ga dee hagaduasala.

21 De hilihili dangada e dee se hegau danuaa;

aagai tangada e hai naa donu de mee dee heohi i hiidinga o de ngadi gaavange hagasenga.

22 Tangada gailalopoli e kona de lodo gi moolau dono lava,

gai ia e dee iloo bolo ia e duu ange naa donu gi tuasala.

23 Tangada e hagaheohi ina laa dahi dangada,

e laumalie de abodonu aana e kave i muli mai,

ia e kii ange i tangada e hagasegesege ina ange dangada.

24 Tangada e gaiaa ina laa mee a dono damana aabe go dono dinana,

ga hagadaba, “Au tigi haisala donu” —

se soa donu niio tangada e oohaa ina mee.

25 Tangada nnoo hagamau mee e hai naa ga dee heloongoi dangada,

aagai tangada e hagadonusia Tagi Maolunga e hagadagadaga age naa.

26 Tangada e hagadonu laa donu huu ia se dangada lodo senga;

aagai tangada e hai hegau i de heiangi e ola donu.

27 Tangada e abodonu ange laa gi de gau hagaau aloha e dee duasala naa donu;

aagai tangada e dee anga ange gi gilaadeu, e duu ange naa gi denga hagamalaia lagolago.

28 De masavaa naa huu o de gau baubau e sula ai ga mmahi, gai dangada ga mmuni;

aagai de masavaa naa huu olaadeu e maakau ai, gai gilaadeu e heohi gu hagadagadaga age.