1 Be goai e hagaseegina i hanonga lagolago, gai e hagamakaga ono lodo,

e daa hagalele naa donu dono lagohia — gai ia e dee ieiangi naa donu.

2 De masavaa olaadeu e heohi e hagadagadaga age ai, gai dangada e malangilangi;

aagai de masavaa naa huu o tangada baubau e dagi ai, gai dangada e duasala.

3 Tangada e lodo laa de heiangi e hagamalangilangi dono damana,

aagai tangada e hai soa ange laa gi denga haahine hai be se manu

e moumou donu huu dono lava.

4 Go de mee heohi a dahi hodooligi e maua ai

i de hai gi nnoho paba de henua,

aagai de hodooligi e nnoo ange

gi denga ngadi gaavange hagasenga e oha de henua.

5 Be goai e hagasegesege ina ange tangada

e bei tangada e dugua laa dahi galauna gi llave ai luoono vae.

6 Tangada baubau e noodia donu huu i ono haisala,

aagai tangada heohi e daahili ma de malangilangi.

7 Tangada heohi e iloo de heohi o de gau hagaau aloha;

aagai tangada baubau e dee maanadu de mee nei.

8 De gau doo mee e bei tangada e duungia laa de aduhale,

aagai de gau heiangi e hai ga sili de lili o tangada.

9 Noo tangada heiangi e gaavange dahi dangada lodo senga gi de hainga,

gai tangada lodo senga e lili naa donu huu ma de gadagada,

gai e dee tuu naa donu de hagalongaa.

10 De gau daa dangada e kino i tangada e hai hegau i de heohi,

gai gilaadeu e ssala tangada heohi e daa gi magau.

11 Tangada lodo senga e hagasula mai donu dono lili,

aagai tangada heiangi e golomagi ono lodo.

12 Noo tagi e daudali i denga muna hhadu,

gai dagi alodahi i ono lalo e hulo naa ga ni dangada baubau.

13 Tangada hagaau aloha ma tangada e vaivai haia dangada e dagodo daudahi donu huu i de mee nei:

go Tagi Maolunga e haia olaau ganomada e tilo ai.

14 Noo de hodooligi e hagamodu muna o de gau hagaau aloha i de heohi,

gai dono nohoanga hodooligi e hagaduu naa ga makaga.

15 De laagau haele e hai ga heiangi tangada,

aagai de gauligi e dee haelea laa e hagadogaa dono dinana.

16 De masavaa naa huu o de gau baubau e hagadaga age ai,

gai de baubau e hagadaga age naa hogi;

aagai de gau heohi e gidee naa delaadeu hagadee kii ina.

17 Haelea dau dama, gai ia ga hai ai gi noho baba goe;

ia e hai naa goe ga malangilangi.

18 Ga deai naa huu midi hagaago ange,

gai dangada gu hai donu huu olaadeu lodo,

aagai e manuuia tangada e daohia de hainga.

19 Denga muna e dee maua i de hagaheohi tangada hai hegau,

go hiidinga e dee galemu naa donu dono donu ange, aagai ia e dee anga ange naa donu aagena.

20 E kii ange de dahi adaadeu tali ange gi tangada lodo senga

i tangada e hagamoolau laa ga basa.

21 Tangada e hakide ina ange dono dangada hai hegau mai i dono gauligi,

gai ia e gaamai naa de hai ngadaa i muli mai.

22 Tangada lillili e hai ga dee heloongoi magavaa o dangada,

gai tangada e lili i masavaa alodahi e dee modu de haisala.

23 De lodo maolunga o tangada e hai ga maolalo ia,

aagai tangada lodo maolalo e kave naa de hagadubu.

24 Tangada e hagabuni ange gi tangada gaiaa e kino i dono mouli donu;

ia gu hai dahi hagatoo donu, gai ia gu dee maua i de tala hagadonu.

25 Doo madagu i tangada e nnoa goe bei ssele,

aagai be goai e hagadonusia Tagi Maolunga e ola.

26 E soa dangada e ssala de abodonu mai i daho dahi dagi,

aagai de hagamodu muna heohi se mee mai i daho Tagi Maolunga.

27 Tangada heohi e kino i tangada baubau,

gai tangada baubau e kino i tangada e haia de mee heohi.