30
Muna a Agur
1 Muna a Agur tama daane a Jakeh — ni muna hagadaemaha.
Taane nei ne tala ange gi Ithiel,
ange gi Ithiel ma Ucal:*ange gi Ithiel, ange gi Ithiel ma Ucal, aabe go de Maadua, au gu dalea mmao; de Maadua, au gu dalea mmao.
2 Go au hugadoo e senga i dangada;
au e deai sogu iloo mee bei dangada.
3 Au tigi agoago i dagodo o de heiangi,
aabe go de iloo mee o de Ia Dabu laa.
4 Goai gu hanage gi de langi ma gu ahe iho?
Goai gu boogia de madangi i lodo luoono lima?
Goai gu sabinia denga vai i dahi malo?
Goai ne hagatuulia dege o henua i lalo?
Goai dono ingoo, gai goai de ingoo o dana dama?
Daalaa mai noo koe e iloo!
5 Muna hugadoo a de Maadua e heohi abodonu;
gai ia e bei de mee hungihungi e buibui ai gilaadeu e mmuni i ono daha.
6 Aude hagapuni ina ange dahi muna gi ana muna,
ia kana hagasee goe, gai gu iloo bolo koe se dangada hadu muna.
7 E lua agu mee e dangidangi adu ai,
gai koe gi dee daohia mee nei i de au i mua dogu magau:
8 gaavee gee de mee dee heohi ma de hadu muna mai i ogu daha;
gai haia gi dee hagaau aloha au aabe gi kona dogu lava,
aagai gaamai donu huu gai e danuaa mai gi de au i dahi laangi;
9 kana gona odi naa huu de lagolago agu mee, gai au ga hagangadi mee goe,
gai au ga hagadaba, “Goai donu go Tagi Maolunga?”,
aabe e kona dogu hagaau aloha, gai au ga gaiaa,
ga dee hagadubu ai de ingoo o dogu Maadua.
10 Aude hagabaubau ina ange dahi dangada hai hegau gi dono dangada aamua,
ia kana hagabaubau goe, gai koe gu haisala.
11 E hanu dangada e hagamalaia olaadeu damana
gai e dee hagamanuuia olaadeu dinana.
12 Hanu dangada e maanadu bolo gilaadeu e gilimalali,
gai tigi hagagilimalali donu denga mee hakino gee i olaadeu lodo.
13 Hanu dangada e kona de lodo maolunga,
gai e kona de hagangadi mee dangada.
14 Dangada e kangi olaadeu niho bei denga gadilaasa,
gai ivi o olaadeu gauvae e bei denga hulu manu kangi,
gai gilaadeu e hagaduasala ai de gau hagaau aloha i honga de henua
ma de hai gi odi gilaadeu e duasala
i magavaa o dangada.
15 Dahi dangaloa unu dodo e dogolua ana damaa hine;
gilaau e hagataba, “Gaamai, gaamai!”
E dolu mee e dee maua donu gi lava olaadeu mee e llodo ai,
gai e haa mee dee haihai donu ga hagataba, “Gu lava!” —
16 go de mommee o de gau maakau, go de hine e dee maua gi haanau,
go de gelegele e dee maua laa gi lava vai iai,
aama de ahi e dee haihai laa ga hagataba, “Gu lava!”
17 Tangada e hakadanga i dono damana
ma de kino i de hagallongo ange gi dono dinana
e naonao ina naa luoono hadu mada i denga raven o de geelonga,
ma de gaina i denga vulture.
18 E dolu mee e kona de hagalele mouli olaadeu dagodo,
gai e haa mee oogu e dee donu ange aagena:
19 go dagodo o de igele i lo te langi i lunga,
ma dagodo o de labodo i honga dahi hadu,
ma dagodo o de vaga i honga de moana,
aama dagodo o taane madali dahi damaa hine.
20 Aanei dagodo o de hine dau bodu dagodo haisala:
ia e gaimee, ga lava ga ssolo dono ngudu,
ga hagadaba, “Au tigi hai donu dahi mee dee heohi.”
21 E dolu mee e haia ga bolebole henua i lalo,
gai e haa mee o henua i lalo e dee bau ange aagena:
22 go tangada hai hegau e sula laa ga se hodooligi,
ma tangada lodo senga e gaimee laa ga bosu,
23 ma de hine o dangada e kino ai, gai gu hai bodu,
ma de hine hai hegau e gaavee laa tuulanga o dono hahine aamua.
24 E haa mee vaaligiligi i henua i lalo,
gai e kona de heiangi:
25 denga loa e dee ni manu mmahi,
aagai e hagabudu alaadeu gai i de masavaa mahanahana;
26 denga badger i lodo hadu e dee ni manu mmahi,
gai e hai olaadeu hale i magavaa o denga hadu;
27 denga itebuubuu e deai donu selaadeu hodooligi,
gai gilaadeu alodahi e hagatau ma e hulo ai;
28 de belu e maua i de poo i de lima o tangada,
aagai e noho i lodo hale o denga hodooligi.
29 E dolu mee mahamaha delaadeu hai e seesee ai;
e haa mee e tilo danuaa i delaadeu seesee:
30 go de laiono, e mmahi ange laa i denga manu aada alodahi,
e deai se mee daudahi oona e madagu ai;
31 ma de gaagoo daane e seesee hagasoenga laa, ma de guudi daane,
aama de hodooligi madali dono hagabuulinga hebagi.
32 Noo koe se lodo senga ga hagamaolunga ai donu huu goe,
aabe koe gu hagatau e hai de baubau,
gai koe bonodia doo ngudu i doo lima.
33 Vai uu e kalo laa e hulo ga ni bada;
de usu e duugia laa e sali mai ai todo,
gai e bei ai hogi dau hai ga lili tangada e hidi mai ai de hebagi.
*30:1 ange gi Ithiel, ange gi Ithiel ma Ucal, aabe go de Maadua, au gu dalea mmao; de Maadua, au gu dalea mmao.