4
Ange gi tagi o taahili; e hua madali denga mee hagadangidangi iai daula. Se Psalm nii David
1 Dogu Maadua heohi, basa mai gi de au,
i de masavaa aagu e hagahi adu ai goe!
Koe gi hagamaamaane ina ogu lodo i dogu duasala.
Degi mai gi de au mage hagalaangona dagu dalodalo.
2 Dangada, dee hee maa taulooloa doodou hagangadi mee au?
Gai dee hee maa taulooloa doodou tala hanu ngadi muna,
ma de ssala muna hagasenga?
Selah
3 Goodou gi iloo bolo Tagi Maolunga e vvae tangada heohi gi se dangada niiona;
Tagi Maolunga e hagallongo dagu dalodalo i de masavaa aagu e hagahi ange ai ia.
4 Goodou llili, aagai goodou gi dee haisala;
goodou hagasaelea mee nei i honga oodou moenga;
goodou gi iloo dagodo o oodou lodo gai goodou ga dee muu.*Eph 4.26
Selah
5 Haia denga sigidaumaha heohi,
gai gi hagadonusia Tagi Maolunga.
6 E soa dangada e hagataba, “Goai e haia mai tanuaa gi gimaadeu?
Tagi Maolunga, haia de maalama o luoo mada gi hagamaalama ina gimaadeu!”
7 Koe gu hai gi kii ange de laumalie dogu malangilangi
i de malangilangi o dangada i de masavaa e lagolago ai grain ma tau uvaini.
8 Au e dagodo iho ga seni i de baba;
go hiidinga go koe donu huu Tagi Maolunga,
e maua i de hai au gi noho baba.