1 Tagi Maolunga gi balea adu goe i doo duasala;

de ingoo o de Maadua o Jacob gi buibuia goe!

2 Ia gi gaavadu doo bale mai i de hale dabu

ma de gaavadu gi de goe de bale mai i Zion.

3 Gai ia gi dee ngalo au sigidaumaha alodahi,

gai gi malangilangi i au sigidaumaha dudu.

4 Gai ia gi gaavadu gi de goe doo mee e lodo ai,

ma de hagassula au hagatau alodahi.

5 Gimaadeu e hevaalogi naa ga malangilangi i doo kii,

ma de hagaduu age demaadeu hagailonga i de ingoo o demaadeu Maadua.

Tagi Maolunga gi gaavadu mee alodahi oou gu dangidangi ange ai.

6 Au gu donu iho bolo Tagi Maolunga

e hagaola de ia aana gu hagadabu i de lolo;

ia e basa ange gi de ia mai i dono mommee dabu i de langi

ma de hagaola ia i dono lima madau mmahi.

7 De tali hagalodolodo a hanu go denga hada hebagi,

gai hanu go denga hoosa,

aagai gimaadeu e hagamaanadu de ingoo o Tagi Maolunga, demaadeu Maadua.

8 Gilaadeu e hagamaolalo ina naa ma de baakuu,

aagai gimaadeu e hiihidi age naa ga tuu gi makaga.

9 Tagi Maolunga, hagaola ina de hodooligi,

gai basa mai gi gimaadeu i demaadeu hagaagahi.