1 De langi e hagaago mai de mahamaha o de Maadua;

mee i lo te langi e tala dagodo ana hegau ne hai.

2 Denga laangi e aheahe ange ma e tala,

denga boo e aheahe ange ma e hagaago mai dono iloo mee.

3 E deai e pasa aabe ni muna e tala;

e dee langona hogi olaadeu leo.

4 Olaadeu leo*olaadeu leo, aabe go alaadeu duudanga daahili. e hulo ma e tae gi henua i lalo alodahi,

gai alaadeu muna e tae gi de bido laa o henua i lalo.*Rom 10.18

De Maadua gu hagaduu dahi hale malo moo de laa i lo te langi,

5 de laa e sobo age bei taane gu hai bodu e sao mai laa i lo tono aabi,

gai e bei taane hagadaahao e malangilangi laa i de savini e houhou.

6 De laa e sobo age i de baasi gee o de langi,

gai e hano ga danu i de baasi ange laa;

gai e deai donu se mee daudahi e dee langona iho dono mahana.

7 De hainga a Tagi Maolunga e honu danuaa,

gai e hagammahi de lodo;

muna a Tagi Maolunga ni muna abodonu,

gai e hai ga heiangi gilaadeu e ssenga.

8 Mee a Tagi Maolunga e hagasauaa e heohi,

gai e hagamalangilangi lodo o tangada.

Muna a Tagi Maolunga e gilimalali,

gai e hagamaalama luu mada o tangada.

9 De madagu i Tagi Maolunga e gilimalali,

gai e dagodo ga hano ai.

De hagamodu a Tagi Maolunga se muna abodonu

gai e heohi alodahi.

10 Ana muna e hagamogomogo ange i goolo, ma goolo danuaa hugadoo;

gai e maimai ange i denga hooni

ma denga hooni mai i lo te mommee iai hooni.

11 Muna nei e hagakana ange lodo o doo dangada hai hegau;

gai e laumalie donu de hagaoanga o tangada e daohia muna nei.

12 Goai e maua gi iloo ono haisala?

Koe gi degi mai gi ogu haisala e dee iloo laa.

13 Buibuia hogi doo dangada hai hegau gi dee haisala i de hai ogu lodo;

gai ogu haisala gi dee dagina hogi au.

Gai gi dee haisala ai au i de haisala laumalie.

14 Haia agu muna e tala ma hagasaele i ogu lodo

gi ni mee e hagamalangilangi ina goe,

Tagi Maolunga, go koe dogu baba makaga ma dogu Ia Hagaola.