18
Ange gi tagi o taahili. Se Psalm nii David, tangada hai hegau o Tagi Maolunga. Ia ne hadu ange taahili nei gi Tagi Maolunga i de laangi a Tagi Maolunga ne hagaola ai ia mai i ono hagadaumee alodahi, aama mai i a Saul. Ia ne hagadaba:
1 Tagi Maolunga, au e aloha i de goe, go koe ogu mahi.
2 Tagi Maolunga go dogu baba makaga,
ma dogu mommee buibui makaga, ma dogu Ia Hagaola;
dogu Maadua go de baba makaga, go ono daha oogu e mmuni ai.
Go ia dagu mee hungihungi, ma de hanga manu e hagaola ina mai au,
ma dogu mommee buibui makaga.
3 Au e hagahi Tagi Maolunga, go de ia e heohi dagu tuhi,
gai au gu ola mai i ogu hagadaumee.
4 Denga daula o de magau gu vini au;
de mee mmilo e oohaa laa mee gu haoli au.
5 Daula o de mommee o de gau maakau gu saabini au,
gai sele o de magau gu daohi au.
6 Au ne hagahi Tagi Maolunga i dogu duasala;
au ne dangi ange gi dogu Maadua i de bale.
Ia ne langona mai dogu leo i dono temple,
gai dagu dangi gu dae ange ai gi luoono dalinga.
7 Henua i lalo gu ngalungalue ma de bolebole;
dagelo o denga mounga gu ngalungaalue,
ma de bolebole i hiidinga ia gu lili.
8 De useahi gu buu mai i lodo luoono bongaa usu;
de ahi ula gu sao mai i lo tono ngudu,
gai denga maga ahi e kaa mai i ono daha.
9 Ia ne hai gi baa iho de langi, gai ia ga iho ai,
denga hagausinga maadolu i lalo luoono vae.
10 Ia e gage i honga dahi cherubim ma e lele ai;
ia e lele i luu bakau o de madangi.
11 Ia e haoli ia i de gohu,
gai dono hale malo go denga hagausinga maadolu,
e hoohonu laa i denga vai.
12 De maalama i mada luoono mada e sula mai laa lodo ana hagausinga,
madali denga dibadibaa haisi aama uila.
13 Tagi Maolunga e basa mai i de langi bei de babaa denga hatuli,
de Ia Maolunga Mmao laa gu hai gi langona dono leo,
i magavaa o denga dibadibaa haisi ma denga maga ahi.
14 Ia e tili dao o dana mee hholu gi mavaevae saele ai denga hagadaumee;
de labalaba o denga uila e hai gi ssenga ange gilaadeu.
15 Lodo ava o tai gu ssula age,
gai dagelo o henua i lalo gu gidee,
i dau hagasee e Tagi Maolunga,
ma dau busi luoo bongaa usu.
16 Ia ne ino iho i de mommee maolunga ga poo au;
ia ne dada age au mai i lo te moana gelo.
17 Ia ne hagaola mai au i dogu hagadaumee mmahi,
ma mai i gilaadeu e kino i de au,
go hiidinga gilaadeu e mmahi ange i de au.
18 Gilaadeu ne hebagi mai gi de au i de laangi oogu ne hai ngadaa ai,
aagai Tagi Maolunga ne bale mai au.
19 Ia ne hagasao mai au ga dugu i de mommee lahalaha;
ia ne hagaola mai au, i hiidinga ia e malangilangi i de au.
20 Tagi Maolunga gu sui mai dogu heohi;
ia ne hagao mai au gi bei de gilimalali o agu hegau.
21 Go hiidinga au ne daohi haiava o Tagi Maolunga;
au tee hai de baubau ga hano gee ai i dogu Maadua.
22 Au ne daohi ana hagamodu alodahi;
au tee tili donu ana mee gu hagasauaa.
23 Au tigi haisala donu i mada luoono mada,
gai au ne daohi gi dee haisala au.
24 Tagi Maolunga gu hagao mai au, gi bei dagodo o dogu heohi,
ma de gilimalali o agu hegau i mada luoono mada.
25 Koe e hai hegau i de mee abodonu ange gi tangada
e hai hegau i de mee abodonu;
koe e hai hegau i de heohi ange gi gilaadeu e heohi.
26 Koe e hai hegau i de gilimalali
ange gi gilaadeu e gilimalali,
aagai e hagaago ange gi de gau vaivai daakodo doo alasala.
27 Koe e hagaola gilaadeu e llodo maolalo,
aagai e hagamaolalo gilaadeu e llodo maolunga.
28 Tagi Maolunga, go koe e haula dagu laama i masavaa alodahi;
dogu Maadua e hai gi maalama de gohu i ogu daha.
29 Go koe e haia gi kii au i dahi hagabuulinga hebagi,
gai dogu Maadua e hai gi maua e au i de gage laa honga de buibui.
30 De Maadua, ono dagodo e honu abodonu;
muna a Tagi Maolunga e heohi abodonu.
Ia se buibui niiolaadeu alodahi e mmuni i ono daha.
31 Goai de Maadua, e dee go Iahweh donu huu?
Gai goai de baba makaga,
e dee go taadeu Maadua donu huu?
32 Go ia de Maadua e hagammahi ina mai au,
ma de hai gi heohi abodonu dogu haiava.
33 Ia e hai luoogu vae gi bei luu vae o dahi dia,
ma de hai gi maua e au i de duu i honga mommee maolunga.*Hab 3.19
34 Ia e hai gi aabo luoogu lima i de hebagi,
gi maua ai e au i de tili de mee hholu e hai i bronze.
35 Koe e buibui au i dau hagaola,
doo lima madau e daohi au gi dee baguu,
gai koe ne ino iho ga hai au gi se dangada maolunga.
36 Koe ne hagaduu au i de mommee lahalaha,
gai luoogu vae tee ssege donu.
37 Au ne doolohi ogu hagadaumee ga daa gilaadeu,
gai au tee ahe dua donu ga dae ai gi de odi gilaadeu i de maakau.
38 Au ne daa gilaadeu ma gu dee maua i de hiihidi age ange;
gilaadeu gu baakuu ma gu daakodo i lalo luoogu vae.
39 Koe ne gaamai gi de au de mmahi e hebagi ai;
koe ne hai ogu hagadaumee gi too gi ogu lalo.
40 Koe ne hai ogu hagadaumee gi saavini gi hulo gee,
gai au gu daa gilaadeu e kino i de au.
41 Gilaadeu ne dangidangi i dahi bale,
aagai teai donu dangada ne hagaola ina gilaadeu;
gilaadeu ne tangi ange gi Tagi Maolunga,
aagai ia tee basa ange gi gilaadeu.
42 Au ne hagailiili gilaadeu gi lligi
bei dagodo o de mama e ilihia laa i de madangi;
au ne llingi gilaadeu gi daha
bei dagodo o de bela i honga denga haiava.
43 Koe gu hagaola mai au i gilaadeu e hai baasi mai gi de au.
Koe gu hai au go tagi o denga huaahenua;
dangada aagu e dee iloo gu hai hegau mai gi de au.
44 De masavaa donu huu alaadeu ne langona ai agu muna,
gai gilaadeu ga hagallongo mai gi de au;
de gau henua gee e bolebole i ogu mada i mua.
45 De gau henua gee gu deai selaadeu tali;
gilaadeu e sasao mai i lodo olaadeu mommee buibui makaga ma de bolebole.
46 Tagi Maolunga e mouli!
Hagadegi ina dogu baba makaga!
Hagaamua ina de Maadua, dogu Ia Hagaola!
47 Go ia de Maadua e suuia ange mee gu hai mai gi de au,
ma de hai denga huaahenua gi nnoho i ogu lalo.
48 Ia gu hagaola mai au i daho ogu hagadaumee;
koe gu hai au gi maolunga ange i gilaadeu e vaivai haia dangada;
koe gu hagaola mai au i de gau daa dangada.
49 Deenei ai, Tagi Maolunga, au e tuhi goe i magavaa o denga huaahenua;
au e daahili ma de tuhi doo ingoo.*Rom 15.9
50 Ia ne hai gi kii de hodooligi aana gu hili,
ia e abodonu ange gi taane aana gu hagadabu i de lolo,
ange gi David ma dono aamuli ga hano ai.