22
Ange gi tagi o taahili; e hua i de leo o “Tia o boo taiao”. Se Psalm nii David.
1 Dogu Maadua, dogu Maadua, gu aha gu tili ai naa goe au?
Gu aha gu kona ai naa doo mmao gee ma dau dee hagaola dogu mouli,
i dogu masavaa e mmae ai?*Mat 27.46; Mark 15.34
2 Dogu Maadua, au e dangi i de laangi, aagai koe e dee basa mai;
au e dangi i de boo, au e dee maua donu i de hagamabu.
3 Aagai koe e dabu, gai doo nohoanga go de tuhi a de gau Israel.
4 Omaadeu maadua madagidagi ne hagadonusia goe;
gilaadeu ne hagadonusia goe, gai koe ga hagaola gilaadeu.
5 Gilaadeu ne tangi adu gi de goe, gai koe ga hagamouli gilaadeu.
Gilaadeu tee dookaa i delaadeu hagadonusia goe.
6 Aagai au se ilo e dee se dangada,
dangada e kino ma de hagangadi mee au.
7 Gilaadeu alodahi e gidee au e doo mee i de au;
gilaadeu e hagasomosomo mai olaadeu alelo gi de au,
ma de geugeu olaadeu biho:*Mat 27.39; Mark 15.29; Luke 23.35
8 “Ia e hagadonu Tagi Maolunga;
Tagi Maolunga gi hagaola ina ia.
Ia gi hagamouli ina ia,
i hiidinga ia e malangilangi i de ia.” *Mat 27.43
9 Aagai go koe ne hagasao ina mai au i de mommee o denga dama;
koe ne hai au gi hagadonusia goe
i de masavaa oogu e unuunu ai i de gaanuunu o dogu dinana.
10 Go koe dagu tali mai i dogu haanau;
gai go koe dogu Maadua mai i dogu masavaa i lo te dinae ai o dogu dinana.
11 Koe gi dee hagammao gee i de au,
go hiidinga de hai ngadaa e baa mai donu gi de au,
gai e deai e balea mai au.
12 Denga kaau lagolago e duuli luoogu baasi;
denga kaau mmahi o Bashan e duuli au;
13 gilaadeu e hhanga mai olaadeu ngudu gi de au,
bei denga laiono alasala e hagangolo laa.
14 Au gu bei denga vai gu llingi laa,
ogu ivi alodahi gu ngaalue;
ogu lodo gu bei dagodo o de candle,
gu odi laa i de vaivai.
15 Ogu mahi gu masa bei de gumedi hadu, gai dogu ua gu buni;
koe gu danu au i lo te gelegele o de magau.
16 Denga gaaduu gu duuli luoogu baasi;
de hagabuulinga o de gau baubau gu duuli au,
gilaadeu gu hagalagolagohia luoogu lima ma luoogu vae.
17 Ogu ivi gu tuu mai,
gai dangada gu haaina ngau.
18 Gilaadeu gu vaevae ogu malo i olaadeu magavaa,
ma de hai tada e tilo ai be goai e gaavee dogu malo.*Mat 27.35; Mark 15.24; Luke 23.34; John 19.24
19 Aagai koe, Tagi Maolunga, aude hagammao gee i de au!
Go koe ogu mahi, hagamoolau balea mai au.
20 Hagamouli ina mai au i de gadilaasa,
ma de hagaola dogu mouli hagamogomogo nei mai i denga gaaduu mmahi laa.
21 Hagaola ina mai au i de ngudu o de laiono,
gai hagamouli ina mai au i hanga o de kaau aada.
22 Au e tala ange naa doo ingoo gi ogu daina;
au e tuhi goe madali de hagabuulingaa dangada.*Heb 2.12
23 Goodou e maatagu i Tagi Maolunga, duuhia ia!
Goodou denga hagadiilinga o Jacob, hagadubu ina ia!
Denga aamuli o Israel alodahi, goodou hagadubu ina ia!
24 Go hiidinga ia tee hagangadi mee be tee anga ange gi de hagaduasala ina o tangada;
ia tee hagammuni luoono mada i de ia,
aagai ne hagallongo dono dangidangi ange i de bale.
25 Au e tuhi goe madali doo hagabuulingaa dangada;
gai au e hagassula agu mee gu hagatoo donu ai
i madamada olaadeu e maatagu i de goe.
26 De gau hagaau aloha e gaimee naa ga boobosu;
gilaadeu e saalaa Tagi Maolunga e tuhi naa ia,
gai oodou lodo gi mouli ga hano ai!
27 Henua i lalo alodahi e manadua, ma de daahuli mai gi Tagi Maolunga;
gai aamuli alodahi o denga huaahenua e daumaha adu naa gi de goe.
28 I hiidinga go Tagi Maolunga e maolunga;
gai go ia e hodooligi i denga huaahenua alodahi.
29 De gau lava alodahi o henua i lalo e daonga naa ma de daumaha;
gilaadeu alodahi e maakau laa e ino naa i ono mada i mua —
aama tangada e dee maua laa i de hagaola dono mouli.
30 Denga hagadiilinga i muli mai e daumaha ange naa gi de ia;
dagodo o de Ia Aamua laa e tala ange naa gi denga atangada e loomai.
31 Gilaadeu e tala ange naa gi dangada tigi haanau
dagodo o ana hegau heohi alodahi ne hai.