1 Tagi Maolunga, au e hagahi goe;

go koe dogu baba makaga, aude bonodia luoo dalinga i de au.

Noo koe e dee muu mai,

gai au e bei donu dangada gu hulo laa gi de mommee o de gau maakau.

2 Hagalaangona dogu dangidangi adu koe gi abodonu mai,

i de masavaa oogu e dangi adu ai i de bale,

ma dagu haalo adu ai luoogu lima gi doo mommee dabu mmao.

3 Aude gaavee gee au madali de gau baubau,

ma gilaadeu e haia de baubau;

go gilaadeu e pasa danuaa ange gi dangada ange laa,

aagai olaadeu lodo go de baubau donu huu iai.

4 Hagao ina ange gilaadeu gi bei alaadeu hegau,

ma alaadeu hegau baubau.

Hagao ina ange alaadeu hegau ne hai,

hagaahea ange alaadeu hegau baubau gi gilaadeu.*Rev 22.1

5 Go hiidinga gilaadeu e hagangadi mee hegau a Tagi Maolunga,

ma ana hegau hagalele mouli ne hai,

ia e oha naa gilaadeu gai e dee hagaahe age naa donu.

6 Hagadegi ina Tagi Maolunga,

go hiidinga ia gu hagallongo dogu dangidangi ange i dono abodonu.

7 Go Tagi Maolunga ogu mahi ma dagu mee hungihungi;

au e hagadonu ia, gai au gu kave de bale i ono daha.

Au gu malangilangi mmao,

gai au e hagaahe ange de abodonu gi de ia i taahili.

8 Go Tagi Maolunga e hagammahi ina ono dangada,

gai go ia de mommee buibui makaga e hagaola ai de ia aana gu hagadabu i de lolo.

9 Hagaola ina doo huaadangada ma de hagamanuuia dangada o doo boolonga;

gai koe gi hagaloosi ina ma de saabai gilaadeu ga hano ai.