1 Go Tagi Maolunga dogu hagamaalama ma dogu hagaola;

gai goai ai naa donu oogu e madagu ai?

Go Tagi Maolunga de buibui makaga o dogu mouli;

gai goai ai naa donu oogu e madagu ai?

2 De masavaa o de gau baubau e hebagi mai ai,

e daa ai au gi magau,

gai ogu hagadaumee ma gilaadeu e kino i de au

gu odi i de baakuu ga maakau.

3 Gai ga duuli ina naa donu e dahi hagabuulinga hebagi luoogu baasi,

gai au e dee madagu donu,

gai ga hebagi mai naa donu gilaadeu gi de au,

gai e dahi donu agu tali.

4 E dahi mee aagu e dangidangi ange ai gi Tagi Maolunga,

gai deenei dagu mee e ssala:

go dogu noho i lo te hale o Tagi Maolunga i taulooloa dogu mouli,

e daumada ai de mahamaha o Tagi Maolunga

ma de ssili i ono daha i lo tono temple.

5 Gai ia e buibui naa donu au i dono mommee noho i de masavaa hai ngadaa;

ia e hagammuni au i lo tono hale malo,

ma de dugu age au i honga de baba maolunga.

6 Gai au e kii naa i ogu hagadaumee e duuli ina luoogu baasi;

au e hai naa ssigidaumaha i dono hale malo i de malangilangi laumalie

ma de daahili ga tuhi Tagi Maolunga.

7 Tagi Maolunga, hagalaangona dogu leo

i de masavaa aagu e hagahi adu ai goe,

koe gi abodonu mai gi de au

ma de basa mai gi dagu dangidangi.

8 Koe gu hai mai, “Saalaa gi gidee e goodou luoogu mada!”

Ogu lodo e hai adu gi de goe,

“Tagi Maolunga, au e ssala donu gi gidee e au luoo mada!”

9 Koe gi dee hagamuunia luoo mada i de au,

koe gi dee alualumia doo dangada hai hegau i doo lili;

go koe nogo balea mai au.

De Maadua, dogu Ia Hagaola,

koe gi dee kino aabe gi hano gee mai i ogu daha.

10 Gai ga dilia naa donu au i luoogu maadua donu,

aagai Tagi Maolunga ga abodonu mai gi de au.

11 Tagi Maolunga, agoagona mai au i doo haiava,

dagina adu au i de haiava soe,

i hiidinga o ogu hagadaumee.

12 Koe gi dee dugua ange ogu hagadaumee gi haia mai gi de au olaadeu mee e llodo ai;

go hiidinga de gau hadu muna gu hai baasi mai gi de au,

gilaadeu gu nnoho e vaivai hai au.

13 Au e hagadonusia bolo au e gidee naa donu de abodonu o Tagi Maolunga

i dogu mouli i henua i lalo nei!

14 Koe gi tali hagalodolodo ange gi Tagi Maolunga;

koe gi lodo mmahi ma de lo taane,

aama de tali ange Tagi Maolunga.