1 Tagi Maolunga, koe gi daalaa bolo au e heohi,

go hiidinga au e seesee i de heohi;

au e hagadonu Tagi Maolunga,

au e dee lua lodo donu.

2 Tagi Maolunga, hagataalea ange ma gi diiloo ogu dagodo;

gai hagataalea ange dagodo o ogu lodo ma agu hagasaele.

3 Go hiidinga doo aloha e hano i ogu mada i mua,

gai au e daudali adu i de goe i de muna abodonu.

4 Au e dee noho madali de gau hadu muna,

aabe hagabuni ange gi gilaadeu e daahanga ina dangada;

5 au e kino i de hagabuulinga e haia de baubau,

gai au e dee lodo e noho madali de gau baubau.

6 Tagi Maolunga, au e hhui luoogu lima i dogu dee haisala,

ma de holiage luu baasi doo mommee o ssigidaumaha;

7 au e hai gi laumalie dogu leo e tala tuhi ai goe,

ma de tala dagodo o au hegau hagalele mouli alodahi.

8 Tagi Maolunga, au e malangilangi i de hale oou iai,

go de mommee iai doo mahamaha.

9 Koe gi dee gaavee dogu mouli madali de gau haisala,

aabe go de kave dogu mouli madali de gau daa dangada,

10 go dangada e haia denga hagatau baubau,

go gilaadeu e gaavee denga ngadi gaavange hagasenga.

11 Aagai au e seesee i de muna abodonu;

hagaola ina mai au ma de abodonu mai gi de au.

12 Au gu duu i de mommee soe,

gai au ga tuhi ai Tagi Maolunga madali de hagabuulinga soa.