1 Tagi Maolunga, au e dalodalo adu gi de goe.

2 Dogu Maadua, au e hagadonu goe;

koe gi dee hagadogaa ina loo au,

aabe gi dugua ange ogu hagadaumee gi tae olaadeu lodo i ogu hiidinga.

3 Gai gi deai donu se dangada

e daalia adu goe e dogaa;

aagai haia gi dookaa gilaadeu

e hai baasi adu gi de goe i teai hiidinga.

4 Tagi Maolunga, hagaagona mai gi de au oo lodo,

gai agoagona mai au i oo haiava;

5 dagina ngau i de mee abodonu ma de agoago mai ai au,

i hiidinga go koe dogu Maadua ma dogu Ia Hagaola;

go koe dagu tali hagalodolodo i laangi alodahi.

6 Tagi Maolunga, manadua doo degi ma doo abodonu,

go hiidinga mee nei gu hai mai loo madagidagi.

7 Koe gi dee manadua ogu haisala ma ogu baubau

i de masavaa oogu e dama daane ai.

Tagi Maolunga, manadua mai au i doo lodo aloha,

i hiidinga koe e danuaa!

8 Tagi Maolunga e danuaa gai e heohi;

deelaa ai, ia e agoago ange dono haiava gi gilaadeu e haisala.

9 Ia e dagi gilaadeu e llodo maolalo i mee heohi

ma de agoago ange gilaadeu i dono haiava.

10 Haiava alodahi o Tagi Maolunga iai de aloha ma de hai hegau i de mee abodonu,

gai ni mee ange gi gilaadeu e daohia dana hagatoo donu hagaheloongoi.

11 Tagi Maolunga, go hiidinga doo ingoo, degi mai gi ogu baubau, gai e lagolago mmao.

12 Goai naa huu tangada e madagu i Tagi Maolunga?

Gai ia e agoago ange ia i de haiava oona e hano ai.

13 Tangada bee nei e hagadagadaga age i laangi alodahi,

gai dono aamuli e henua naa i de henua.

14 Tagi Maolunga e tala ange ono lodo gi gilaadeu e maatagu i de ia;

ia e hai gi iloo e gilaadeu dana hagatoo donu hagaheloongoi.

15 Au e daumada donu huu Tagi Maolunga,

i hiidinga go ia e aaua gee luoogu vae mai i lo te sele.

16 Huli mai gi de au, gai abodonu mai gi de au;

i hiidinga au gu hagaaloha ogu dagodo ma de duasala.

17 Ogu hai ngadaa gu kona mmao de lagolago;

haia gi ilaage au mai i ogu duasala.

18 Anga mai diiloo dogu duasala ma dogu hai ngadaa,

gai degi mai gi ogu haisala alodahi.

19 Galo ange diiloo de kona de soa ogu hagadaumee,

ma de kona delaadeu kino i de au.

20 Hagaloosia dogu mouli, gai hagaola ina ngau;

aude dugua ange gilaadeu gi hagadogaa ina ngau,

i hiidinga go koe dogu buibui.

21 De hai hegau i de mee abodonu ma de heohi gi buibuia ngau,

i hiidinga go koe dagu tali hagalodolodo.

22 De Maadua, hagaola ina Israel

mai i olaadeu hai ngadaa alodahi.