1 Henua i lalo ma mee alodahi iai nii Tagi Maolunga,

ma honga henua ma dangada alodahi e nnoho ai;*1 Co 10.26

2 i hiidinga go ia ne haia de mee nei i honga tai,

ma de hagaduu i honga denga saalingaa vai.

3 Goai e maua i de hanage gi de mounga o Tagi Maolunga?

Gai goai e maua i de duu i dono mommee dabu?

4 Go tangada e gilimalali luoono lima ma ono lodo;

ia e dee daumaha ange gi dahi diinonga i ono lodo,

aabe e hagatoo donu i dahi mee hhadu.*Mat 5.8

5 Tangada bee nei e kave naa de manuuia mai i daho Tagi Maolunga,

gai de Maadua dono hagaola e tala naa bolo ia e heohi.

6 Aanei dagodo o de atangada o dangada e saalaa ia,

go gilaadeu e saalaa luu mada o de Maadua o Jacob.

7 Denga haitoga o de aduhale, maahuge mai;

denga abaaba madagidagi, maahuge mai,

gai de Hodooligi o de mahamaha ga ulu mai.

8 Goai de Hodooligi o de mahamaha nei?

Go Tagi Maolunga mmahi ma de sauaa laa,

go Tagi Maolunga e mmahi laa i de hebagi.

9 Denga haitoga o de aduhale, maahuge mai;

denga abaaba madagidagi, maahuge mai,

gai de Hodooligi o de mahamaha ga ulu mai.

10 Goai de Hodooligi o de mahamaha nei?

Go Tagi o denga hagabuulinga hebagi,

go ia de Hodooligi o de mahamaha!