1 Tagi Maolunga, go koe dogu buibui;

koe gi dee hagadogaa ina loo au;

gai hagaola ina hogi au i doo heohi!

2 Hagabaa ina mai doo dalinga gi de au,

hagamoolau mai hagaola ina dogu mouli.

Go koe de baba oogu e mmuni ai,

gai go de hale buibui makaga oogu e ola ai.

3 Go koe dogu baba makaga ma dogu mommee buibui makaga;

dagina huu au ma de poo dogu lima i hiidinga doo ingoo.

4 Hagauia de galauna alaadeu gu buulou ai au,

i hiidinga go koe dogu buibui.

5 Au e dugu adu dogu hagasaalunga gi lo too lima;

Tagi Maolunga, de Maadua,

e hai hegau laa i de muna abodonu, koe gi hagaola ina ngau.*Luke 23.46

6 Au e kino i gilaadeu e daumaha ange

gi denga diinonga e deai olaadeu haigamaiana:

aagai au e hagadonusia Tagi Maolunga.

7 Au e lodo danuaa ma de malangilangi i doo lodo aloha,

i hiidinga koe e gidee dogu hagaduasala ina,

ma de donu ange gi de duasala ogu lodo,

8 gai koe tee gaavange au gi ogu hagadaumee,

gai ne hai au gi duu i de mommee lahalaha.

9 Tagi Maolunga, abodonu mai gi de au i dogu duasala;

luoogu mada gu hhua i dogu dangi,

gai e bei ai hogi dogu hagasaalunga ma dogu angaanga.

10 Dogu mouli gu honu i de hai ngadaa,

gai au e gonogono i dogu duasala;

gu deai ogu mahi i hiidinga dogu hagaduasala ina,

gai ogu ivi e hagadaga mai huu de baageaa.

11 Ogu hagadaumee gu hagangadi mee au,

dangada e paa mai gi de au e kino i de au;

dangada e iloo au gu maatagu i de au,

gai gilaadeu e hedae mai gi de au i honga de haiava e saavini ma e hulo gee i de au.

12 Gilaadeu gu ngalo au bei dagodo o tangada gu magau,

au gu bei dagodo o de gumedi hadu gu mahaa laa.

13 Au e langona dangada soa e hagadau musumusu i de au;

de mee hagamaatagu gu dagodo i mommee alodahi;

gilaadeu gu buni e hai baasi mai gi de au

ma de hai dahi hagatau e daa ai au gi magau.

14 Aagai au e gai adu gi de goe, e Tagi Maolunga,

au e hagadaba, “Go koe donu dogu Maadua.”

15 Go koe e daohia dogu mouli;

hagaola ina mai au i ogu hagadaumee ma mai i gilaadeu e vaivai haia ngau!

16 Koe gi malangilangi i de au doo dangada hai hegau;

hagaola ina mai au i doo lodo aloha e deai laa se helui.

17 Tagi Maolunga, aude dugu ange gi hagadogaa ina ngau,

i hiidinga au e dangi adu gi de goe;

haia gi dookaa de gau baubau,

gai gilaadeu gi dee mmuu gi hulo ai gi de mommee o de gau maakau.

18 Hagapunidia ngudu o de gau hadu muna,

go de gau hagamaolunga ma de lodo maolunga

e pasa hagamaolunga laa i gilaadeu e heohi.

19 Ga dae laa de laumalie doo abodonu,

gu hagadabena ange gi gilaadeu e maatagu i de goe,

ma de abodonu ange gi gilaadeu e haia goe go delaadeu buibui

i madamada o dangada!

20 Koe e hagammuni gilaadeu i mada luoo mada,

mai i hagatau baubau a dangada;

koe e buibui gilaadeu i doo mommee

mai i dangada e hagabaubau ina gilaadeu.

21 Hagadegi ina Tagi Maolunga,

go hiidinga ia ne lodo aloha mmao i de au,

i de masavaa oogu e noho ai i de aduhale gu duuli ina luu baasi.

22 Au ne hagadaba i de manavasaa ogu lodo,

“Au gu aau gee mai i mada luoo mada!”

Aagai koe ne langona dagu dangidangi

i de masavaa aagu ne hagahi adu ai goe gi balea mai au.

23 De gau dabu alodahi, goodou aaloha i Tagi Maolunga!

Tagi Maolunga e buibui tangada e hai hegau i de muna abodonu,

aagai e sui ange donu hegau a tangada hagamaolunga.

24 Goodou alodahi e tali hagalodolodo ange gi Tagi Maolunga,

goodou gi lodo mmahi ma de lo taane!