32
Se Psalm nii David. Se Maskil*Maskil se muna ange gi denga hai daahili. Dono hagadoonunga e dee iloo danuaa.
1 E manuuia tangada a de Maadua gu degi ange gi ono haisala,
gai ono haisala gu haoli.*Rom 4.7-8
2 E manuuia tangada a Tagi Maolunga
e dee dau ange ono baubau gi de ia,
gai ono lodo e deai se muna hagasenga iai.
3 De masavaa aagu ne hagammuni ai ogu haisala,
gai dogu angaanga gu hagadaga mai
gai au e manava i lunga mai i taiao ga boo ai.
4 De laangi ma de boo gai doo lima e hagadaemaha mmao au;
gai gu deai ogu mahi bei de mahana o de masavaa hagamahana.
Selah
5 Au e tala adu ogu haisala gi de goe,
au e dee hagammuni donu ogu baubau;
au ne hagadaba, “Au e tala ange ogu haisala gi Tagi Maolunga;”
gai koe ne degi mai gi ogu haisala.
Selah
6 Deenei ai, dangada alodahi e heohi gi dalodalo adu gi de goe
i de masavaa alaadeu e maua ai goe;
ni muna abodonu, de masavaa naa huu e hagahonu age ai de vai mmahi,
gai gilaadeu gu dee maua gi daea adu ia.
7 Go koe dogu mommee e mmuni ai,
koe e buibui au i de hai ngadaa;
ma de hai au gi daahili i taahili o de hagaola.
Selah
8 Au e tala adu naa ma de agoago adu goe i doo haiava e hano ai;
au e tala adu naa au mee e hai aama de tilo adu goe.
9 Koe gi dee bei de hoosa aabe go dahi donkey e dee maua laa gi donu ange,
aagai e hai dono ngudu gi daohi i de baalanga ma mee nnoa,
ga mee naa huu gai gilaadeu e dee loomai gi oo daha.
10 E lagolago daemaha o de gau baubau,
gai de abodonu o Tagi Maolunga e duuli tangada e hagadonusia ia.
11 Goodou alodahi e heohi,
lodo danuaa ma de malangilangi i Tagi Maolunga!
Goodou alodahi e heohi oodou lodo,
hevaalogi i de malangilangi!