1 Goodou e heohi laa, hevaalogi daahili ange gi Tagi Maolunga;

e heohi de daahili olaadeu e heohi ga tuhi.

2 Duuhia Tagi Maolunga i de lyre,

hagadangidangi ange gi de ia i de harp e madaangahulu laa ono daula!

3 Daahili ange gi de ia i taahili hoou;

hagadangidangi ma de hevaalogi i de malangilangi.

4 Go hiidinga muna a Tagi Maolunga e heohi gai ni muna abodonu,

gai ia e hai hegau i de mee abodonu i ana hegau alodahi.

5 Ia e malangilangi i mee heohi ma de hagamodu heohi,

gai de abodonu o Tagi Maolunga gu hagadohu henua i lalo alodahi.

6 Tagi Maolunga ne tala de muna, gai gu hai de langi,

gai mee alodahi iai ne hai i de madangi ne busi mai i lo tono ngudu.

7 Ia ne hagabudu denga lausedi bei vai i lo te manu hao vai;

gai ia ne dugu de moana gelo i lodo mommee doange.

8 Henua i lalo alodahi gi maatagu i Tagi Maolunga,

gai dangada alodahi e nnoho ai gi maatagu i de ia!

9 Go hiidinga ia ne basa, gai gu hai ga bei;

ia ne tala de muna, gai gu hanu mee.

10 Tagi Maolunga e hai gi dee ssula hagatau a denga huaahenua,

ma de hai gi dee haigamaiana hagatau a dangada.

11 Muna bale a Tagi Maolunga e daakodo ga hano ai,

ana hagatau ni mee ange gi denga atangada alodahi.

12 E manuuia de huaahenua go Tagi Maolunga delaadeu Maadua,

ma dangada aana gu hili go ono dangada!

13 Tagi Maolunga e galo iho i de langi ma e tilo dangada alodahi.

14 Ia e noho i honga dono nohoanga maolunga

ma e tilo ai dangada alodahi e nnoho i henua i lalo;

15 de ia ne haia lodo o dangada alodahi,

go de ia hogi e gidee mee alodahi alaadeu e hai.

16 De hodooligi e dee ola i hiidinga de soa dono hagabuulinga hebagi;

gai taane abo i de hebagi e dee ola i de kona dono mahi.

17 E deai haigamaiana dau tali ange de hoosa gi hagaola ina goe;

gai e dee galemu donu dono mahi,

gai ia e dee maua donu i de hagaola dahi.

18 Aagai Tagi Maolunga e daumada gilaadeu e maatagu i de ia,

ma gilaadeu e tali hagalodolodo ange gi dono abodonu,

19 gai ia e hagaola gilaadeu mai i de magau,

ma de tilo gi mouli gilaadeu i de masavaa o de onge.

20 Demaadeu tali hagalodolodo go Tagi Maolunga;

go ia demaadeu bale aama demaadeu mee hungihungi.

21 Gimaadeu e malangilangi i de ia,

i hiidinga gimaadeu e hagadonusia dono ingoo dabu.

22 Tagi Maolunga, abodonu mai gi gimaadeu,

gi bei demaadeu tali hagalodolodo adu gi de goe.