34
Se Psalm nii David, i de masavaa aana ne daahanga ai Abimelek bolo ia gu senga, gai de hodooligi laa ga alualu ia gi hano gee mai i ono daha
1 Au e tuhi Tagi Maolunga i masavaa alodahi;
au e duudagi naa donu huu de tuhi ia.
2 Dogu hagasaalunga e tala tuhi dagodo o Tagi Maolunga,
gai gilaadeu e lodo maolalo e malangilangi naa i delaadeu langona.
3 Hagaamua ina Tagi Maolunga madali au,
gidaadeu ga hagaamua dono ingoo!
4 Au ne ssala Tagi Maolunga, gai ia ne basa mai gi de au;
ia ne hagaola mai au i mee alodahi oogu e madagu ai.
5 Gilaadeu e tali hagalodolodo ange gi de ia e malangilangi;
gai gilaadeu e dee dookaa naa donu.
6 Tangada hagaaloha nei ne dangi,
gai Tagi Maolunga gu langona dana dangi,
ga hagaola ia mai i ono hai ngadaa alodahi.
7 Tangada de langi o Tagi Maolunga e duuli ma de hagaloosi
gilaadeu e maatagu i de ia, aama de hagaola gilaadeu.
8 Mami ange mage diiloo bolo Tagi Maolunga e danuaa;
e manuuia tangada e buibui i ono daha!*1 Pe 2.3
9 Goodou ono dangada dabu gi maatagu i Tagi Maolunga,
i hiidinga gilaadeu e maatagu i de ia e dee duasala donu.
10 Denga laiono mmahi e duasala ma de hiikai;
aagai gilaadeu e saalaa Tagi Maolunga e dee duasala donu i dahi mee daudahi.
11 Agu dama, loomai hagalaangona agu muna;
gai au ga agoago adu goodou i de madagu i Tagi Maolunga.
12 Goai tangada e lodo i de mouli
ma de lodo mmao gi mouli ia i laangi lagolago,
ma de gidee mee danuaa?*1 Pe 3.10-12
13 Koe gi daohia doo alelo mai i de baubau,
gai doo ngudu gi dee daalaa hanu muna hhadu.
14 Koe gi hano gee i de baubau, gai haia tanuaa;
ma de ssala gi maua e goe de noho paba.
15 Tagi Maolunga e dagitilo gilaadeu e heohi,
gai luoono dalinga e hagallongo alaadeu dangidangi.
16 Tagi Maolunga e hai baasi ange gi de gau baubau,
ma de hai gi deai selaadeu hagamaanadu i henua i lalo.
17 Gilaadeu e heohi e tangi, gai Tagi Maolunga e langona delaadeu tangi;
ia e hagaola gilaadeu mai i olaadeu hai ngadaa alodahi.
18 Tagi Maolunga e hagabaa ange gi gilaadeu e daemaha olaadeu lodo,
ma de hagaola gilaadeu gu deai selaadeu tali.
19 Ga lagolago naa donu hai ngadaa o tangada heohi,
aagai Tagi Maolunga e hagaola mai ia i mee nei hugadoo.
20 Ia e buibui ono ivi alodahi;
gai e deai naa donu se ivi daudahi e hadi.*John 19.36
21 De baubau e daa naa ga magau tangada baubau;
gai hagadaumee o tangada heohi e hagaduasala naa donu.
22 Tagi Maolunga e hagaola ono dangada hai hegau;
gai e deai donu se dangada aana e buibui e hagaduasala.