1 Tagi Maolunga, hai baasi ange gi gilaadeu e hai baasi mai gi de au;

ma de hebagi ange gi gilaadeu e hebagi mai gi de au.

2 Hagauda ina dau mee hungihungi ma oo malo hebagi,

ma gi hidi age balea mai au!

3 Daangia mai doo dao damaa mee ma doo dao laumalie;

hebagi ange ai gi gilaadeu e dolohia ngau!

Hai mai gi dogu hagasaalunga,

“Go au e hagaola ina goe!”

4 Haia gi dookaa ma de hai gi hagamaolalo ina

gilaadeu e saalaa laa au e daa gi magau;

haia gilaadeu e nnoho e hebagi mai gi de au

gi aahe dua ma de ssenga ange.

5 Gai gilaadeu gi bei denga gili grain e ilihia saele laa i de madangi,

gai tangada de langi o Tagi Maolunga gi dolohia gilaadeu gi hulo.

6 Haia gi gohu ma de segesege delaadeu haiava,

gai tangada de langi o Tagi Maolunga gi dolohia gilaadeu!

7 Go hiidinga gilaadeu ne hagammuni delaadeu galauna, gai teai donu agu mee ne hai,

ma de geli dahi geelinga gi doo ange ai au gi ono lodo.

8 Haia gi dee angahia e gilaadeu de humai o de hai ngadaa gi gilaadeu;

gilaadeu gi vinia i de galauna alaadeu gu dugu laa,

ma de too ange gi lo te geelinga laa gi dee ssula age ai gilaadeu.

9 Gai au e malangilangi naa i Tagi Maolunga,

ma de lodo danuaa i dana hagaola.

10 Au e hagadaba naa i ogu lodo alodahi,

“Tagi Maolunga, goai e bei oo dagodo?

Koe e hagaola tangada hagaau aloha mai i tangada e mmahi ange i de ia,

gai tangada hagaau aloha ma de duasala i gilaadeu e gaiaadia alaadeu mee.”

11 De gau tala hagadonu hadu muna e hagabaubau au;

gilaadeu e ssili mai gi de au mee aagu e dee iloo.

12 Gilaadeu e sui mai agu hegau danuaa i de baubau,

ma de hai gi hagaaloha ogu dagodo.

13 De masavaa olaadeu ne mmagi ai,

gai au ne gahu i malo daladala, ma de hagahiigai,

gai au ne ino gi lalo ga dalodalo, gai tee basa mai.

14 Au ne hano saele ma de hinangalosaa

bei dogu hinangalosaa i dogu soa aabe go dogu daina.

Au ne ino gi lalo i de daemaha ogu lodo

bei dogu dangi i dogu dinana donu.

15 Aagai de masavaa oogu ne hai ngadaa ai,

gai gilaadeu ne hagabuni ga malangilangi.

Gilaadeu ne hagabuni e hai baasi mai gi de au,

gai de gau alasala aagu e dee iloo laa tee tuu donu delaadeu hagabaubau au.

16 Gilaadeu e bei de gau vaivai dangada hagammae manava;

gilaadeu e kadi mai olaadeu niho gi de au.

17 Dogu Ia Aamua, dee hee maa taulooloa dau tilo mee nei?

Hagaola ina mai au i alaadeu hegau vaivai daakodo,

hagaola ina dogu mouli mai i denga laiono nei.

18 Gai au ga tuhi ai goe i magavaa o de hagabuulingaa dangada soa,

ma de hagadegi goe i magavaa o dangada soa.

19 Koe gi dee dugua ange ogu hagadaumee

gi tae olaadeu lodo i ogu hiidinga;

koe gi dee dugua ange gilaadeu e kino i de au i teai hiidinga

gi hagadabadaba ina mai olaadeu ganomada gi de au.*Psa 69.4; John 15.25

20 Gilaadeu e dee pasa e hagaheloongoi magavaa o dangada,

gai e hai baasi ange gi dangada e nnoho danuaa laa donu huu i honga de henua.

21 Gilaadeu e hhanga mai olaadeu ngudu ma e hai mai,

“Gu vakaa loo! Gu vakaa loo!

Gimaadeu gu gidee donu au mee ne hai!”

22 Tagi Maolunga, koe e gidee mee nei, aude noho gi dee muu!

Dogu Ia Aamua, aude hagammao gee mai i de au!

23 Dogu Maadua ma dogu Ia Aamua, hidi age,

daalaa hagadonu ina dogu heohi aama dogu donu!

24 Tagi Maolunga dogu Maadua,

hagamodu ina bolo au e dee haisala i doo heohi;

koe gi dee dugua ange gilaadeu gi malangilangi i ogu dagodo.

25 Koe gi dee dugua ange gilaadeu gi hagataba,

“Gu vakaa loo, gu tae donu omaadeu lodo!”

Koe gi dee dugua ange gilaadeu gi hagataba,

“Gimaadeu gu hai ia gi dee sula age.”

26 Hagadookaa ina ma de hai gi ssenga ange

gilaadeu alodahi e malangilangi i dogu hai ngadaa!

Haia gi dookaa ma de ssenga ange gilaadeu e hagamaolunga i de au!

27 Haia gi hevaalogi i de malangilangi ma de llodo danuaa,

gilaadeu e llodo danuaa i dogu hagaheohi;

gai gilaadeu gi hagataba i masavaa alodahi,

“Hagaamua ina Tagi Maolunga, go de ia e malangilangi

i de duadonu o dono dangada hai hegau.”

28 Gai au e tala naa dagodo o doo heohi

aama de tuhi goe mai i taiao ga boo ai.