1 De haisala e basa ange gi lodo o tangada baubau.

Gai e deai donu se madagu o de Maadua i ono daha.*Rom 3.18

2 Go hiidinga ia e tuhi donu huu ia,

bolo ono baubau e dee gidee donu aabe e hakino gee.

3 Ana muna e tala e baubau, ma de daahanga dangada;

ia gu dee hai hegau i de heiangi ma tanuaa.

4 Ia e hai donu hogi denga hagatau baubau i honga dono moenga;

ia e hagababa ange ia gi dahi haiava e dee danuaa;

gai ia e dee kino donu i de baubau.

5 Tagi Maolunga, doo aloha e hano loo ga dae gi de langi,

doo hai hegau i de mee abodonu e dae age gi denga giliiga.

6 Doo heohi e bei denga mounga maolunga;

dau hagamodu muna e bei de moana gelo.

Tagi Maolunga, koe e tilo danuaa ange dangada ma manu.

7 De Maadua, e hagamogomogo mmao doo abodonu!

Gai dangada e buibui i lalo de malu o luoo bakau.

8 Gilaadeu e gaimee i mee lagolago i doo hale;

koe e hai gilaadeu gi unu i dau saalingaa vai iai laa de malangilangi.

9 Go koe e daamada mai ai de mouli;

gai go doo maalama amaadeu e gidee ai de maalama.

10 Duudagina de abodonu ange gi gilaadeu e iloo goe,

ma de hagaola gilaadeu e heohi olaadeu lodo.

11 Koe gi dee dugua ange de vae o tangada hagamaolunga

gi hai baasi mai gi de au,

aabe gi dugua ange de lima o tangada baubau

gi alualumia hogi au gi hano gee.

12 Diiloo gilaadeu e haia de baubau gu baakuu ma gu daakodo ai —

gilaadeu gu baakuu ma gu dee maua i de hiihidi age ange!