1 Tagi Maolunga, koe gi dee hagasee ina loo au i doo lili

aabe gi haelea mai au i doo bole.

2 Dao o dau mee hholu gu pigi i dogu angaanga,

gai doo lima gu hagaili au.

3 Gu deai donu mahi i lo togu angaanga, i hiidinga koe gu bole;

au gu kona mmao dogu magi i hiidinga o ogu haisala.

4 Au gu dee bau ange gi ogu mee gu haisala ai;

gai gu bei dagodo o de mee hagauda daemaha.

5 Ogu maanuga gu pilo ma de augaua

i hiidinga dogu lodo senga.

6 Au gu ino luoogu mada gi honga de gelegele;

gai au e daemaha mai i taiao ga boo ai.

7 Dogu angaanga gu vvela mmao,

gai gu deai mahi o dogu angaanga.

8 Au gu baageaa ma tee vaangalue;

gai au gu gonogono i hiidinga taemaha o ogu lodo.

9 Dogu Ia Aamua, ogu lodo alodahi e maahuge adu gi de goe,

gai koe e iloo dogu manava i lunga.

10 Ogu lodo gu bonabona age, gai gu deai ogu mahi;

gai gu deai hogi se maalama i luoogu mada.

11 Ogu soa ma gilaadeu e heloongoi mai gu dee aanga mai gi de au i dogu magi,

gai dangada e paa mai gu hagammao gee i de au.

12 Gilaadeu e llodo e daa au gi magau gu dugu alaadeu sele,

gilaadeu e hagatau delaadeu hai e hagalagohia ai au;

gilaadeu e hagatau delaadeu hai e daahanga ai dangada

mai i taiao ga boo ai.

13 Gai au e bei tangada longoduli, e dee langona laa,

ma dagodo o tangada e dee maua i de basa.

14 Au gu bei dagodo o tangada longoduli,

aama tangada e dee maua i de basa.

15 Tagi Maolunga, go koe dagu tali hagalodolodo;

go koe, dogu Ia Aamua ma dogu Maadua, e basa mai gi dagu dalodalo.

16 Au e hagadaba, “Aude dugua ange gilaadeu gi kada i de au,

ma de pasa hagamaolunga i de masavaa oogu e baguu ai.”

17 Au gu dai baguu donu,

gai au e mmae i masavaa alodahi.

18 Au e tala adu dagodo o ogu baubau;

au gu dee baba i ogu haisala.

19 Ogu hagadaumee e mmahi mmao,

gai e soa gilaadeu e kino i de au i teai hiidinga.

20 Dangada e sui mai agu hegau danuaa i de baubau

e hagabaubau au i hiidinga dogu hagammahi e hai tanuaa.

21 Tagi Maolunga, koe gi dee dilia loo au!

Dogu Maadua, koe gi dee hagammao gee i de au!

22 Hagamoolau humai balea mai au,

de Ia Aamua dogu Ia Hagaola!