1 Au ne hagadaba, “Au e dagitilo naa ogu haiava

ma de daohi dogu alelo gi dee haisala;

au e nnoa naa dogu ngudu

i taulooloa de nnoho o de gau baubau i dogu mommee iai.”

2 Aagai de masavaa oogu e noho ai ga dee muu,

ma tee tala hanu muna danuaa;

gai au gu kii ange tee baba ogu lodo.

3 Ogu lodo gu dee baba mmao;

gai ga hagasaelea huu e au mee nei, gai ogu lodo gu bei de ahi ula;

gai au ga basa ga hagadaba:

4 “Tagi Maolunga, hagaagona mai de hagaodi o dogu mouli,

ma taelodo o laangi oogu e mouli ai;

haia gi donu ange au dagodo de moolau de odi o dogu mouli.

5 Tilo, koe ne hai gi podo ogu laangi bei dahi ianga,

gai ogu ngadau e mouli ai e bei donu teai i oo daha.

Ni muna abodonu, de mouli o dahi

e bodobodo donu huu bei de madangi o de manava.

6 Ni muna abodonu, tangada e seesee saele bei dagodo o dahi goohunga;

ni muna abodonu, ana hegau e deai donu haigamaiana;

ia e hagabudu goloa lagolago, gai ia e dee iloo be goai e mee ai.

7 Dogu Ia Aamua, goai aagu e tali ange aagena?

Au e tali hagalodolodo adu gi de goe.

8 Hagaola ina mai au i ogu haisala alodahi;

koe gi dee dugu ange de gau llodo ssenga gi kada i de au.

9 Au ne dee muu; au tee tala hanu muna,

i hiidinga go koe donu ne haia de mee nei.

10 Duudia dau hagailiili au;

au gu dee vaangalue i de kona dau hagailiili au.

11 De masavaa aau e haele ai dangada

ma de hagasee gilaadeu i hiidinga olaadeu haisala,

gai koe e oha ono goloa hagamogomogo bei hegau a de goa.

Ni muna abodonu, dangada alodahi e bei donu huu de madangi o de manava.

12 Tagi Maolunga, hagalaangona dagu dalodalo,

hagalaangona dogu dangi adu koe gi balea mai;

koe gi dee hagangadi mee ina dogu dangi.

Go hiidinga au se dangada e noho gaainga

gai se dangada henua gee bei ogu dubuna madagidagi alodahi.

13 Koe gi dee hagaduasala ina au,

gi ahe ange ai au gi malangilangi,

i mua dogu hano ga dee maleva.”