1 E manuuia tangada e abodonu ange gi tangada hagaau aloha!

Tagi Maolunga e hagaola naa ia i de masavaa oona e hai ngadaa ai.

2 Tagi Maolunga e buibui naa ia ma de daohi dono mouli;

ia e hagamanuuia naa ia i honga de henua,

gai e dee dugu ange ono hagadaumee gi haia ange gi de ia olaadeu mee e llodo ai.

3 Tagi Maolunga e hagammahi naa ia i dono magi,

ma de hagaieiangi ia mai i dono magi.

4 Au ne hagadaba, “Tagi Maolunga, abodonu mai gi de au;

hagaieiangi ina ogu magi, go hiidinga au gu haisala adu gi de goe.”

5 Ogu hagadaumee e hagataba i delaadeu kino i de au:

“Go aahee naa donu oona e magau ai gi dee manadua ai dono ingoo?”

6 De masavaa naa huu o dahi dangada e humai ai gi ogu daha,

ga tala mai hanu muna hhadu,

gai ia e kave hanu muna e hai samu ai;

gai ia ga hagadele saele ai muna laa

i dono hano gee mai i ogu daha.

7 Dangada alodahi e kino i de au e hai samu i de au;

gai gilaadeu e llodo gi kona dogu duasala.

8 Gilaadeu e hagataba, “Ia gu hai dahi magi baubau;

ia e dee maua naa donu gi hidi age ange i dono mommee dagodo.”

9 Dogu soa danuaa hugadoo, go de ia aagu e hagadonu,

ma de gaimee madali au,

gu hai baasi mai gi de au.*Mat 26.23; Mark 14.18; Luke 22.21; John 13.18

10 Aagai koe, Tagi Maolunga, abodonu mai gi de au,

hagahidi ina age au, gai au ga sui ange alaadeu mee ne hai.

11 Au e iloo bolo koe e malangilangi i de au,

gai dogu hagadaumee e dee kii donu i de au.

12 Aagai go koe e balea mai au i hiidinga dogu hai hegau i de mee heohi,

koe gu dugu au i mada luoo mada ga hano ai.

13 Hagadegi ina Tagi Maolunga, de Maadua o Israel,

mai i de masavaa e dee ngado mai

ga dae ai gi de masavaa e dee ngado mai!*Psa 106.48