1 Dogu Maadua, au e lodo mmao i de goe

bei de lodo o dahi dia i denga saalingaa vai.

2 Au e lodo mmao i de Maadua, go de Maadua e mouli laa.

Gai go aahee oogu e humai ai gi mada luu mada o de Maadua?

3 Ogu loimada go agu mee e gai i de laangi aama de boo,

gai dangada e ssili mai gi de au i taiao ga boo ai,

“I hee iai doo Maadua?”

4 Aanei agu mee e manadua,

i de masavaa e duasala ai ogu lodo:

au nogo hano madali dangada soa,

ma de dagi gilaadeu ga hulo ai gi de hale o de Maadua;

gimaadeu ne hevaalogi i de malangilangi ma de daahili tuhi,

madali dangada soa i taonga.

5 Dogu hagasaalunga, gu aha gu daemaha ai naa goe,

gai gu aha gu manavasaa ai naa goe?

Haia go de Maadua dau tali hagalodolodo;

go hiidinga au e ahe ange naa donu ga tuhi ia,

dogu Ia Hagaola 6 ma dogu Maadua.

Dogu hagasaalunga gu daemaha mmao;

deenei ai, au e manadua goe

i de henua o Jordan ma Hermon,

aama de mounga go Mizar.

7 De moana gelo e basa ange gi dahi moana gelo

i de hadihadi o denga beau;

gai au beau hadihadi alodahi gu hagaabulu au.

8 Tagi Maolunga e hagaago mai

dagodo o dono lodo aloha i de laangi;

gai de boo dana daahili e madali au,

gai au e dalodalo ange gi de Maadua o dogu mouli.

9 Au e hai ange gi de Maadua dogu baba makaga,

“Gu aha gu ngalo ai naa goe au?

Ni haigamaiana aha dogu hano saele ma de daemaha ogu lodo,

i de hagaduasala a ogu hagadaumee au?”

10 Au gu kona mmao dogu mmae

i de hagammae manava a ogu hagadaumee au,

ma delaadeu hai mai gi de au i taiao ga boo ai,

“I hee iai doo Maadua?”

11 Dogu hagasaalunga, gu aha gu daemaha ai naa goe,

gai gu aha gu manavasaa ai naa goe?

Haia go de Maadua dau tali hagalodolodo;

go hiidinga au e ahe ange naa donu ga tuhi ia,

dogu Ia Hagaola ma dogu Maadua.