45
Ange gi tagi o taahili; e hua bei de leo o “Denga lilii”. Se Maskil nii de aamuli o Korah; se daahili niio de hagadau aaloha
1 Ogu lodo gu honu malingilingi i muna hagamalangilangi;
au e hua ange agu daahili gi de hodooligi;
gai dogu alelo e bei de biini sisi a tangada labagau i de sisi.
2 Koe e mahamaha ange i denga daane;
au muna e tala iai de abodonu,
deelaa ai, de Maadua gu hagamanuuia goe ga hano ai.
3 Taane mmahi, daulia dau gadilaasa i honga doo dege;
gai hakahu ina goe i de mahamaha ma de hagadubu.
4 Savini i honga de hoosa i de mahamaha gai koe gi kii,
i de muna abodonu, ma de daudonu, aama de mee heohi;
gai koe gi hagaagona mai hegau hagalele mouli a doo lima madau e hai.
5 Dao o dau mee hholu e kangi i de tili gi ulu gi lodo o oo hagadaumee, e de hodooligi;
gai denga huaahenua gu nnoho i oo lalo.
6 De Maadua, doo nohoanga e dagodo ga hano ai e dee ngado mai.
De laagau o doo nohoanga hodooligi go de laagau o de hagamodu heohi.*Heb 1.8-9
7 Koe e lodo i de mee heohi gai e kino i de baubau.
Deenei ai, de Maadua, doo Maadua, gu hai goe gi maolunga ange i oo soa ange laa,
i dana hagasulu goe i de lolo o de malangilangi.
8 Oo malo alodahi e hagamanongi i myrrh ma aloe aama cassia.
Denga mee hagadangidangi iai daula mai i denga hale ivory e hagamalangilangi goe.
9 Hanu oo haahine hagadubu ni damaa hine nii denga hodooligi;
de hine hodooligi e duu i doo baasi madau ma ono malo goolo mai i Ophir.
10 Tamaa hine, hagalaangona ma gi hagasaelea,
hagangalo ina oo dangada aama doo huaabodu;
11 gai de hodooligi ga malangilangi i doo mahamaha.
Koe gi ino ange gi de ia, i hiidinga go ia doo dangada aamua.
12 Dangada o Tyre e gaamai naa gi de goe denga mee ngadi gaavange;
de gau lava e hagatale naa de hai goe gi malangilangi i gilaadeu.
13 Tamaa hine a de hodooligi e mahamaha mmao i lo tono aabi;
gai ono malo e llanga i goolo.
14 Ia e gahu i malo maaga hagalaagii ga dagi ai gi daho de hodooligi,
ono soa go denga bua mmoe e daudali mai i ono dua,
ma de gaamai ia gi oo daha.
15 Gilaadeu e malangilangi ma de llodo danuaa i de masavaa alaadeu e dagi mai ai ia,
ga ulu gi lo te hale o de hodooligi.
16 Au dama daane e kave naa tuulanga o olaadeu damana;
koe e hai naa gilaadeu gi ni dagi i honga de henua alodahi.
17 Au e hai naa denga atangada alodahi gi manadua goe;
deenei ai, denga huaahenua e tuhi naa goe ga hano ai e dee ngado mai.