1 De Maadua, gimaadeu gu langona i omaadeu dalinga,

gai omaadeu dubuna madagidagi gu tala mai gi gimaadeu,

dagodo o au mee ne hai i delaadeu masavaa,

i denga laangi madagidagi.

2 Koe ne hai gi hulo gee denga huaahenua,

gai ne hai gi nnoho paba omaadeu dubuna madagidagi;

koe ne hagaduasala denga huaadangada

gai ne hai omaadeu dubuna gi hagadagadaga age.

3 Gai e dee go alaadeu gadilaasa alaadeu ne kave ai de henua,

aabe go olaadeu mahi ne haia ga kii gilaadeu;

aagai go doo lima madau, ma doo lima mmahi, aama de maalama o luoo mada,

go hiidinga koe ne malangilangi i gilaadeu.

4 Go koe dogu Hodooligi ma dogu Maadua;

go de ia ne hagamodu ina gi kii Jacob.

5 Go doo sauaa amaadeu ne hagadee kii ai omaadeu hagadaumee;

gimaadeu ne hagamaakulu omaadeu hagadaumee.

6 Au e deai sagu tali ange gi dagu mee hholu,

gai dagu gadilaasa e dee maua hogi i de hagaola mai au,

7 aagai koe gu hagaola gimaadeu mai i omaadeu hagadaumee,

gai ne hagadookaa gilaadeu e kino i gimaadeu.

8 De Maadua, gimaadeu e tuhi goe i masavaa alodahi,

gai gimaadeu e tuhi doo ingoo ga hano ai.

9 Aagai koe ne tili gimaadeu ma de hagadookaa gimaadeu,

koe tee hano madali omaadeu hagabuulinga hebagi.

10 Koe ne hai gimaadeu gi saavini gi hulo gee mai i omaadeu hagadaumee;

gai gilaadeu gu kave omaadeu goloa.

11 Koe ne hai gimaadeu bei denga ssiibi gu hagadabena e daa gi maakau,

ma de hai gimaadeu gi mavaevae saele i denga henua gee.

12 Koe ne hagao oo dangada i dahi hagaoanga damaa mee,

teai mee ne maua i delaadeu hagaoanga.

13 Koe ne hai gimaadeu gi se mee hagadookaa

i daho dangada e paa mai gi gimaadeu,

gai se mee e hakadanga ai

ma de hagangadi mee ina e dangada i omaadeu gaogao.

14 Koe gu hai gimaadeu gi se mee hakadanga i magavaa o denga huaahenua,

gai dangada e geugeu olaadeu biho i gimaadeu.

15 Masavaa alodahi gai au e hagangadi mee ina,

gai au gu kona mmao dogu dogaa,

16 i muna a de gau hagammae manava aama de doo mee,

ma dagu gide de hagadaumee aama tangada e suuia mai de baubau.

17 Mee nei alodahi ne hai mai gi gimaadeu,

gai gimaadeu tee ngalo donu goe,

aabe tee daohi dau hagatoo donu hagaheloongoi.

18 Gimaadeu tigi hulo gee i de goe i omaadeu lodo,

gai gimaadeu tee hulo gee i doo haiava.

19 Aagai koe gu hagaduasala ma de hai gimaadeu

gi bei de mommee o denga jackal,

ma de haoli gimaadeu i de gohu boo dangodango.

20 Noo gimaadeu e ngalo de ingoo o demaadeu Maadua,

aabe e haalo ange omaadeu lima gi dahi diinonga gee,

21 gai de Maadua e iloo donu de mee nei!

Go hiidinga ia e iloo mee i lodo o tangada.

22 Gimaadeu e daia ga maakau i laangi alodahi i oo hiidinga,

gimaadeu e bei dagodo o denga ssiibi gu paba ange laa e daa gi maakau.*Rom 8.36

23 De Ia Aamua, hidi age! Gu aha gu seni ai naa goe?

Alahage! Koe gi dee dilia gimaadeu ga hano ai!

24 Gu aha gu hagammuni ai naa luoo mada i gimaadeu,

ma de hagangalo demaadeu duasala ma demaadeu vaivai haia?

25 Gimaadeu gu ino gi lo te gelegele;

gai omaadeu angaanga gu daakodo i lo te gelegele.

26 Hidi age ma gi humai balea mai gimaadeu;

gai hagaola ina gimaadeu i hiidinga o doo abodonu!