47
Ange gi tagi o taahili. Se Psalm nii de aamuli o Korah
1 Dangada alodahi, baabaa oodou lima!
Hevaalogi daahili ange gi de Maadua i de malangilangi!
2 Go hiidinga Tagi Maolunga, de Ia Maolunga Mmao laa, e hagamadagu mmao,
go ia de hodooligi maolunga o henua i lalo alodahi.
3 Ia ne hai gimaadeu gi hagadee kii ina denga huaahenua,
ma de hai gilaadeu gi nnoho i omaadeu lalo.
4 Ia ne hili de henua e bolo mai gi gidaadeu,
go de mommee o Jacob*Jacob e bei go de gau Israel. e lodo ai, de ia oona e aloha ai laa.
Selah
5 De Maadua gu gage age, gai dangada e hevaalogi!
Tagi Maolunga gu gage age, gai gu ili denga hanga manu.
6 Daahili duuhia de Maadua, daahili duuhia;
daahili duuhia taadeu Hodooligi, daahili duuhia!
7 Go de Maadua de hodooligi o henua i lalo alodahi;
daahili ange gi de ia i dahi Psalm.
8 De Maadua go tagi o denga huaahenua;
de Maadua gu noho i honga dono nohoanga dabu.
9 De gau aamua o denga huaahenua gu hagabuni
madali dangada o de Maadua o Abraham,
go hiidinga denga mee hungihungi i henua i lalo nii de Maadua;
ia e hai naa ga aamua mmao!