1 Tagi Maolunga e maolunga mmao,

gai e heohi de hagalaumalie dono tuhi i lo te aduhale o taadeu Maadua.

Dono mounga dabu 2 e mahamaha gai e maolunga,

go de mommee e malangilangi ai henua i lalo alodahi,

go de mounga go Zion, e duu laa i baasi ngaiho,

go de aduhale o de Hodooligi maolunga.*Mat 5.35

3 De Maadua gu noho i ono hale buibui makaga,

ia gu hagaago mai bolo go ia de mommee buibui makaga.

4 Tilo, denga hodooligi gu hagabuni,

gilaadeu gu buni ma e loomai ai alodahi.

5 De masavaa alaadeu ne gidee ai de aduhale laa, gai gilaadeu gu llele mouli;

gilaadeu ne saavini ga hulo i delaadeu maatagu.

6 Gilaadeu gu manavasaa mmao,

bei dagodo o de hine gu hai ono hagalangona.

7 Koe gu oha vaga o Tarshish

i de madangi mai i dua.

8 Gimaadeu gu langona, ma de gidee

i lo te aduhale o Tagi o denga hagabuulinga hebagi,

ma lo te aduhale o demaadeu Maadua;

de Maadua gu hai de aduhale laa gi dagodo ga hano ai.

9 De Maadua, gimaadeu gu maanadu dagodo o doo abodonu,

i demaadeu tuu i lo too temple.

10 De Maadua, doo tuhi e dae gi henua i lalo alodahi;

bei dagodo oo ingoo:

gai doo lima madau e honu i de heohi.

11 De mounga go Zion gi malangilangi!

Dangada alodahi i Judah gi lodo malangilangi i hiidinga o dau hagamodu heohi!

12 Hannoo seesee saele i Zion, gai holiagina luu baasi,

ga dau taelodo o ono hale dagitilo maolunga;

13 ma de tilo dagodo o dono buibui,

ma de hulo laa lodo ono hale buibui makaga;

gi maua ai e goodou i de tala ange gi de atangada i muli mai,

14 bolo deenei de Maadua, taadeu Maadua, ga hano ai e dee ngado mai.

Go ia e dagina gidaadeu ga hano ai.